Estudante no foinsa’e hamriik iha dalan-ninin, ho entuziasmu hein sua Santidade
DILI,11 setembru 2024 (TATOLI)-Hela minutu balun tan Sua Santidade Papa Francisco, sei ba iha Sentru Konvensaun Dili (CCD), fatin konsentrasaun foinsa’e sira husi Arkidioseze metropolitanu Dili no Dioseze Baucau ho Maliana.
Loromatan hikis nia roman iha Sidade Dili. Nia roman leno mós CCD. Oras hatudu tuku 09h00, alende sarani ka fiar-na’in Katólika no seluktan iha mós estudante sira husi Colégio Paulo IV, sira forma hamriik hein iha Formoza atu ba CCD, hein simu bensaun.
“Ha’u kontente hein Papa iha dalan maske ami eskola. Maibé, manorin sira haruka ami mai forma iha ne’e hodi hein papa tanba oras tan papa hakat ain sai husi Timor-Leste,” Naomi, estudante Colégio Paulo VI ba TATOLI, iha dadeer ne’e.
Tuir estudante referidu, depois ida-ne’e sira sei fila ba sira-nia eskola, hodi tuir aula létiva hanesan baibain.
“Ami mai hein papa iha ne’e tuku 07h00. Dadeer ami mai tau kedas farda Paulos tanba bainhira papa liu ba CCD ami sei fila fali ba eskola hodi tuir matéria ne’ebé mak manorin sira fó,” Estudante Naomi hateten.
Madrugada joven sira nadodon ona ba CCD
Nakukun nia lalatak sei hafalun sidade Dili. Oras tuku haat madrugada. Joven sira – feto no mane, nadodon ona ba CCD, fatin ikus Papa Francisco sei hakotu nia ajenda iha nia Jornada Apostólika mai Timor-Leste, hahú setembru 09-11; durante loron tolu, molok kontinua ba Singapura.
“Papa Francisco enkontru ho ami oras ida iha ne’e, entaun ami uza oportunidade ida-ne’e ho didi’ak,” Letícia Velania Araujo Tavares informa ba TATOLI iha resintu CCD ohin.
Foinsa’e timoroan ne’e dehan, líder mundiál Katólika ida-ne’e enkontru ho juventude sira hahú tuku 09h30.
Tuir observasaun husi TATOLI iha terrenu katak to’o oras nee joven sira nafatin la’o-ain ho antuazismu hodi hakat ba resintu CCD.
Bandeira RDTL no Vaticano, kaer iha liman. Isin-lolon ho faru iha imajen Papa Francisco nian (La’ós hothotu) enfeita ho liafuan “Que a vossa fé seja a vossa cultura” – Atu imi-nia fiar sai imi-nia kultura, sentidu orgullu no fé, nu’udar fiar-na’in no timoroan.
Iha joven, iha mós labarik, ferik no katuas sira, kontinua nafatin hamriik iha dalan-ninin ne’ebé mak Santu padre liu, hanesan hahú husi Nunsiatura Motael mai iha Palasiu Governu to’o iha CCD.
Notísia relevante: https://tatoli.tl/2024/09/11/reprezentante-juventude-3-000-hein-papa-francisco-nia-prezensa-iha-ccd/
Jornalista : Felicidade Ximenes
Editór: Rafael Ximenes de A. Belo
