PAM Ainaro: Amu Papa nia mensajen bazeia ba realidade iha Timor-Leste

DILI, 12 setembru 2024 (TATOLI)–Prezidente Autoridade Munisipiu (PAM) Ainaro, Manuela Georgina Bukar Cortereal, hateten Amu Papa Francisco nia vizita ne’e husik hela mensajen kultura, fiar no domin iha nia vizita pastorál ba timoroan sira.

“Mensajen amu Papa nian bazeia ba iha realidade. Buat barak mak muda kultura, respeita no hadomi malu ne’e menus, entaun amu Papa fó hanoin mai ita atu hare buat sira-ne’e,”  Prezidente Autoridade Munisipiu Ainaro ne’e hateten ba Agência Tatoli, liuhusi telefónika, kinta ne’e.

Manuela Georgina Bukar Cortereal fó ezemplu iha família, se aman karik sai aman di’ak ba oan sira no oan karik sai oan ne’ebé di’ak ba familia no sosiedade.

“Sai oan no joven tenke iha potensia ba futuru nasaun ne’e nian,” nia dehan.

Nia dehan, molok sarani sira desloka ba munisipiu ne’e nia fó hanoin nafatin ba sir kona-ba mensajen amu Papa nian ne’e atu ba implementa iha sosiedade no família.

Sarani sira husi munisipiu Ainaro fila tiha ona ba iha sira-nia suku no aldeia ida-idak ho di’ak.

“Ha’u konfirma ona ho Autoridade Postu Administrativu sira katak sira to’o hotu ona iha sira-nia horik fatin,” nia hateten.

Jornalista : Jesuína Xavier

Editór      : Cancio Ximenes