DILI, 12 Setembru 2024 (TATOLI) – Pesoál husi ministériu, servisu saneamentu no voluntáriu sira rekolla ona lixu iha esplanada Tasi-Tolu, hafoin sarani rihun ba rihun ne’ebé partisipa misa husik fo’er iha fatin ne’e.
Atividade hamoos lixu ne’e hahú horisehik to’o ohin loron. Fo’er sira ne’e mak plástiku no garrafa aqua nian ne’ebé sarani sira sosa hodi hemu durante hein misa ne’ebé prezide husi Papa Francisco iha loron 10 Setembru.
Tuir observasaun jornalista Tatoli, ekipa husi Ministeriu Saúde no Obra Públika mak ohin halo limpeza iha terrenu.
Benjamin da Conceição Sequeira, motorista ba karreta raut lixu husi Autoridade Munisípiu Dili informa katak sira komesa raut lixu dezde horisehik.
“Ema barak mak horisehik halo limpeza no lixu sira ne’e butuk hamutuk iha ne’e, balun tau iha lixeiru mak ami foti de’it. Ami tula hotu iha horisehik loraik ne’e kedas”, Benjamin hateten ba Tatoli, iha Tasi Tolu.
Nia dehan, daudaun ne’e, kontinua tula lixu sira ne’ebé servisu voluntáriu sira tau hamutuk iha ohin dadeer no saneamentu hakarak foti hodi so’e iha Tíbar.
Iha observasaun jornalista Tatoli halo iha horisehik dadeer tuku 09:00 lixu lekar iha areadór Tasi-Tolu, maibé iha oras tuirmai pesoál limpeza no serbisu voluntáriu sira hamoos kedan.
Notísia relevante: Lixu naklekar hela iha arreadór Tasi-Tolu
Jornalista: Jesuína Xavier
Editora: Maria Auxiliadora
