DILI, 13 setemberu 2024 (TATOLI) – Papa Francisco konklui ninia vizita loron tolu iha Singapura hodi termina nia jornada apostólika ba nasaun haat iha ASEAN no Oseania, inklui Indonézia, Papua-Nova Guiné, Timor-Leste no Singapura.
Santu Padre embarka ho Aviaun Singapore Airlines iha Aeroportu Internasionál Changi tuku 11:50 dadeer oras Singapura no sei to’o iha Aeroportu Internasionál Roma tuku 6:25 lorokraik, oras lokál.
Durante ninia vizita loron tolu iha Singapura, Santu Padre hasoru líder polítiku no relijioza, sosidedade sívil, foinsa’e no idozu sira.
Durante enkontru iha Singapura, Santu Padre toka kona-ba asuntu mundiál ne’ebé mak afeta nasaun barak iha mundu, inklui mudansa klimátika, dezigualdade rikeza, esploitasaun traballadór imigrante, menus atensaun ba grupu marzinalijadu, diskriminasaun no seluk. Alende asuntu hirak ne’e, Papa mós ko’alia kona-ba hametin relasaun bilaterál entre Vaticano ho Singapura, no mós hametin fé sarani Katólika Singapura hodi moris iha armonia no fraternidade.
Iha ninia enkontru kortezia ho Prezidente Repúblika, Tharman Shanmugaratnam no Primeiru Ministru, Lawrence Wong, Santu Padre destaka importánsia husi kooperasaun entre nasaun rua.
Hafoin enkontru kortezia referidu, durante enkontru ho membru governu, sosiedade sívil, no korpu diplomátiku, Papa Francisco ho Prezidente Tharman aprezenta kompromisu kooperasan hamutuk hodi buka solusaun ba problema globál.
Pontu importante ne’ebé Papa Francisco subliña iha enkontru ne’e mak, “Singapura nasaun ida riku ho teknolojia modernu no inovativu, tanba ne’e hola papél importante hodi buka solusaun ba problema krize klimatika iha rejiaun Sudeste Aziátiku.
Papa konsidera Singapura nu’udar nasaun ezemplar ba nasaun seluk iha rejiaun, liliu moris iha armonia no fraternidade.
Santu Padre enkoraja líder polítiku sira atu esforsu hodi kria sosiedade justu ba ema hotu iha rejiaun Sudeste Aziátiku no mundu, atu bele halakon diskriminasaun kór, rasa, kultura no relijiaun.
Papa apresia ho polítika governu Singapura nian hodi garante moris di’ak ba sidadaun tomak, maibé nia husu atu Estadu ne’e tau mós matan ba grupu marjinalizadu, espesialmente traballadór migrante sira, no idozu sira.
Alende enkontru ho líder sira, Amu Papa mós hasoru malu ho grupu Katóliku oioin, inklui grupu Jezuita, foinsa’e, no idozu sira hodi ko’alia kona-ba moris nu’udar sarani Katólika iha Singapura.
Iha ninia diskursu, Prezidente Tharman dehan Singapura mantein ho ninia kompromisu atu serbisu hamutuk ho nasaun hotu hodi buka solusaun ba problema globál.
“Mundu ohin loron hasoru problema globál oioin. Tanba ne’e, komunidade globál persiza esforsu maka’as hodi rezolve dezafiu ne’e hamutuk.
Jornalista: Filomeno Martins
Editór: Rafael Ximenes de A. Belo
