SINGAPURA, 13 setembru 2024 (TATOLI) – Papa Francisco konsidera Singapura nu’udar modelu ezemplar ‘Nasaun Fraternidade’ ba rai seluk atu aprende no la’o tuir.
Santu Padre hato’o lia hirak ne’e durante konferénsia viajen fila ba Roma ho Aviaun Singapore Airlines, sesta ne’e.
Papa dehan nia la esperak katak ema konsidera Singapura hanesan Nova Iorke iha Mundu Oriente.
Papa louva sidadaun Singapura tanba kuidadu sira-nia sidade moos. “Povu Singapura mesak povu respeitozu. Uma mesak boot no furak.”
Haree ba komunikasaun no kolaborasaun interrelijiaun ne’ebé forte iha Singpura, Santu Padre dehan, Singapura sai ezemplu fraternidade ba nasaun seluk. “Singapura nu’udar nasaun ezemplar modelu fraternidade.”
Sua Santidade dehan, sidadaun iha Singapura simumalu di’ak la haree ba relijiaun, rasa no kultura. “Ha’u nunka rona kona-ba diskriminasaun ruma iha Singapura.”
“Ha’u hakfodak bainhira haree Singapura hanesan fatin internasionál ida-ne’ebé atrai ema husi kultura oioin. Singapura kapitál ida di’ak liu tanba ha’u nunka haree hanesan ne’e iha fatin seluk,” Papa Francisco tenik.
Relembra hikas katak durante Santu Padre ninia vizita iha Timor-Leste nia mós subliña kona-ba Dokumentu Fraternidade ne’ebé mak Timor-Leste adopta no introduz ona iha kurikulu ensinu báziku.
Tuir dokumentu fraternidade ne’ebé Papa Francisco rasik asina ho Grande Imam Eziptu Al-Azhar, Sheikh Ahmed el-Tayeb, povu husi kultura, rasa no relijiaun oioin presiza simu malu hodi moris hamutuk (konvivénsia) iha domin no dame nia laran.
Aprende prezensa labarik
Iha sorin seluk, Santu Padre dehan, buat ne’ebé Singapura presiza aprende husi Timor-Leste mak prezensa labarik sira nian.
“Ha’u haree labarik barak iha Timor-Leste, maibé iha Singapura, ha’u laharee labarik barak. Ida-ne’e buat ida ne’ebé Singapura presiza aprende husi Timor-Leste. Futuru mak labarik sira. Tau ida ne’e iha neon!” Santu Padre dehan.
Jornalista: Filomeno Martins
Editór: Rafael Ximenes de A. Belo
