DILI, 16 setembru 2024 (TATOLI) – Durante vizita Sua Santidade Papa Francisco iha Timor-Leste (TL) entre loron 09-11 setembru, operadora telekomunikasaun Telemor, fahe kakehe hamutuk 10.300,00 ba sidadaun Timor-oan sira ne’ebé mak tuir misa solene hamutuk ho Sua santidade iha Tasi-tolu Dili.
“Kakehe sira ne’ebé sarani sira simu la’ós de’it satan husi tropikál manas maibé ida ne’e hanesan mós Telemor nia apoiu ba sarani sira,” Sita komunikadu ida refere ba TATOLI, ohin.
Iha komunikadu ne’e sita mós katak apoiu la’ós de’it fahe Kakehe ba sarani sira maibé, Telemor mós kolabora ho PNTL hodi instala totál kuantidade 104 kamera HIK Vision iha área ne’ebe importante sira presiza husi PNTL no hodi fó koneksaun.
PNTL agradese ba kontribuisaun Telemor iha mantein konesaun estável, ne’ebe ajuda ba asegura no seguransa ba eventu nacionál ne’e. “Telemor haksolok ba PNTL no EDTL, parseiru sira hodi agradese ba apoiu”.
Papa Francisco nia vizita iha Tasi-tolu, Dili, Timor-Leste, sai hanesan okaziaun importante no istóriku ida. Telemor kontente tanba apoia ona kakehe ba sarani rihun ba rihun ne’ebé mai rona Sua Santidade Papa Francisco nia mensajen kona-ba esperansa no unidade.
TATOLI
