DILI, 16 setembru 2024 (TATOLI)—Prezidente Repúblika (PR), José Ramos Horta, hateten presiza proteje hodi tau prioridade ba bebé, labarik, feto isin-rua no inan sira tanba sira mak nu’udar reprezenta nasaun nia rekursu iha futuru.
Notísia Relevante: PR Horta: “Ita tenke ativu luta halakon mukit no mánutrisaun’’
Nia hateten, tuir nia avaliasaun labele husik atu aborda kestaun ida-ne’ebé nia konsidera hanesan importánsia fundamentál, tuir kompromisu sira-ne’ebé nia halo publikamente ba Timor-Leste, liuliu emfavór grupu sira-ne’ebé vulnerável liu ne’ebé lahetan protesaun no eskluidu iha sosiedade.
“Kompromisu sira-ne’e, ne’ebé ha’u simu ho laran tomak, koloka bebé sira, labarik sira, feto isin-rua sira no inan sira hanesan prioridade ida. Tanba, ha’u fiar katak sira mak reprezenta ita-nia nasaun nia rekursu ne’ebé sagradu liu, tantu pasadu no prezente no krusialmente ba futuru. Rekursu supremu nasaun Timorense ida-ne’e, ita hotu tenke haburas, proteje no hadomi tebes oan sira, feen ho laen no membru família sira,” PR Horta hato’o nia mensajen iha sesaun solene abertura sesaun lejislativa daruak iha lejislatura daneen iha uma fukum Parlamentu Nasionál (PN), segunda ne’e.
Ho preokupasaun boot mak nia nota nivel aas mánutrisaun inan no oan nian no problema persistente kona-ba stunting, ne’ebé afeta labarik sira-nia kresimentu, klaru katak problema sira-neʼe tau Timor-Leste futuru iha risku.
“Ita presiza urjentemente aproximasaun ida-ne’ebé integradu no efetivu atu kombate mánutrisaun, hodi garante katak labarik timoroan hotu-hotu iha oportunidade atu sai boot ho saudavel no forte,” nia dehan.
Timor-Leste tenke lori atu konsagra kna’ar sentrál feto no inan sira-nian, hodi rekoñese sira nu’udar ruin-kotuk ba família no ba sosiedade no tenke valoriza sakrifísiu ne’ebé feto sira halo iha sira-nia moris tomak, liuliu sofrimentu ne’ebé liga ba maternidade ne’ebé persiste iha tempu dame no funu.
Feto no bebé sira ne’ebé kontente, forte no saudável mak indispensavel ba Timor-Leste nia sobrevivénsia koletiva, tenke investe ho matenek iha instrumentu no mekanizmu sira-ne’ebé nia konsidera esensiál ba fortalesimentu sustentável família sira-nian.
“Ha’u refere, liuliu ba agrikultura família nian, ne’ebé buras iha kintál no jardín sira iha ita nia uma sira iha nasaun tomak. Setór ida-ne’e forma bazeia ba ita-nia seguransa ai-han koletiva no bele sai hanesan fundasaun ba Timor-Leste ida-ne’ebé auto-sufisiente iha produsaun ai-han no reziliente liu ba krize esterna no eventu mudansa klimátika ne’ebé estremu,” nia hateten.
Aposta iha família no área rurál Timor-Leste ida-ne’e, nia hateten, investe ho matenek iha mozaiku inisiativa privada ne’ebé vibrante no ativu, tanba ne’e nia defende atensaun barak-liu ba nasaun loloos, hodi foka ba esplorasaun bee-matan foun sira, kriasaun rezerva estratéjika sira liuhosi tanke no barrajen sira, no distribuisaun komunitária no irrigasaun natar sira ho rekursu folin-boot ida-ne’e.
Nia dehan, bee-moos esensiál ba moris, saúde no prátika ijiene nian ne’ebé asosiadu ho konsumu bee hemu nian, investe iha nasaun reál mós ezije prosimidade boot-liu entre servisu sira no populasaun benefisiáriu sira.
Timor-Leste presiza edukasaun bázika, seguransa sosiál no servisu saúde nian, ho énfaze ba nesesidade klínika rurál sira-ne’ebé ekipadu ho adekuadu no rekursu umanu kualifikadu ba saúde komunitária preventiva.
Rede ida-ne’e tenke mobiliza esforsu sira afavór ba edukasaun saúde nutrisionál, kombate dependénsia ai-han importadu no promove konxiensializasaun entre labarik no família sira kona-ba vantajen husi produtu lokál sira, hanesan proteína, ai-fuan no leguminosa sira, ne’ebé 100% orgániku no livre husi pestisida.
Esforsu ida-ne’e tenke integra iha área rurál sira, munisípiu sira no rejiaun sira país nian, hodi kombina koñesimentu sientífiku kona-ba prátika médika no nutrisionál di’ak sira ho estilu moris saudavel, ne’ebé promove sidadania útil no produtiva, hanesan ezemplu ida mak liuhosi desportu.
Notísia Relevante: “Tau-matan didi’ak ba povu di’ak ida ne’e”-liafuan ikus Papa Francisco ba PR Horta
Jornalista : Nelson de Sousa
Editór : Cancio Ximenes
