VIQUEQUE, 21 setembru 2024 (TATOLI)- Udan boot ne’ebé akontese iha sábadu, hahú husi tuku 10:00, dader, halo mota iha Irabere estraga komunidade Uatucarbau nia hare ne’ebé kolleta ona tanba laiha morru protesaun, atu asegura natar povu agrikultór nian.
“Akontesimentu udan-bo’ot horisehik mota tun tama ami-nia natar Lawadare no Baidubu inkui ha’u-nia natar ektare tolu ne’ebé koa hotu ona, maibé mota tama estraga hotu no hare balun bee lori”, Komunidade afetadu, Mateus da Costa Mendes, ba Agência Tatoli, via telefónika, ohin.
Nia afirma, hare ne’ebé bee hoban ona ne’e bá dulas mós la di’ak ona.
“Ohin, administradór postu administrativu Uatucarbau mai direta haree ona ami-nia hare sira-ne’ebé bee estragu no haruka ami lori sai hotu hare sira-ne’e ba rai maran. Hare ne’ebé estragu aban bainrua dulas sai kinur tanba hoban ona bee laran no atu rai ba fini mós sei la moris”, nia haktuir.
Nune’e nia husu, ministériu relevante tau matan ba povu agrikultór atu fó apoia emerjénsia lona ba agrikultór sira uza hodi salva hare.
“Tinan oin apoia mós hare fini ba agrikultór sira kari tanba ami-nia hare ba epoka ida-ne’e bee maka estraga hotu”. Nia hato’o.
Iha fatin ketak, Xefe Suku Irabin de Baixo, José Baptista do Carmo, haktuir, nu’udar autoridade lokál sente triste tanba akontese udan-bo’ot no anin afeta ba komunidade sira-nia natar no hare sira ne’ebé koa ona no sira-ne’ebé seidauk koa kuaze hetan estragu iha natar Lawadare no Baidubu.
“Ha’u haree natar parte Lawadare no Baidubu maioria hetan estraga ha’u-nia komunidade sira-nia hare ne’ebé koa tiha ona, be’e lori no balun seidauk ko’a be’e estraga hotu”, nia afirma.
Notísia relevante: autoridade-irabin-de-baixo-husu-governu-hadia-irrigasaun-lawadare-uatucarbau/
Enkuantu, tuir dadús natar ne’ebé hetan estragu iha Baidubu ho totál ektre 150 no iha Lawadare ektare 25, husi natar sira-ne’e benefísia ba totál uma-kain 500 iha sukun lrabin de Baixo no suku lima seluk iha postu Uatucarbau.
Tuir dadús populasaun suku Irabin de Baixo ho na’in-2.624, kompostu husi aldeia hitu hanesan aldeia Betoria na’in-175, Lacolorohoo na’in-423, Macaqui na‘in-305, Macausa- na’in-236, Taradiga na’in-338, Taradai na’in-499 no Uatudere na’in-252.
Jornalista : Vitorino Lopes da Costa
Editór : Florencio Miranda Ximenes
