DILI, 23 setembru 2024 (TATOLI)–Ministériu Juventude, Desportu, Arte no Kultura (MJDAK) bazeia ba Planu Asaun Anuál (PAA) no kalendáriu Gabinete Komunikasaun informasaun 2024, segunda ne’e, hala’o enkontru ho jornalista no responsável mídia sira hodi partilla no sosializasaun ba informasaun kona-ba serbisu ministériu tuir polítika no kompromisu Governu.
Programa ne’e hanaran ‘Kafé Hamutuk’, sei hala’o iha fulan-tolu dala-ida, ne’ebé sei envolve diresaun hotu iha MJDAK.
“Programa ohin ne’e ita ko’alia kona-ba asuntu joventude atu informa ba públiku kona-ba asuntu sira ne’ebé mak MJDAK halo iha 2024 nia laran ho orsamentu anuál ne’ebé aloka hamutuk 400.000-resin atu haree ba programa haat ne’ebé iha,” Diretór Jerál Juventude iha MJDAK, David Tomas de Deus, relata hafoin hasoru malu ho jornalista no responsável mídia sira, iha salaun MJDAK, Bidau-Lecidere, segunda ne’e.
Notísia relevante : MJDAK prevee $1,554.917 hodi apoia atividade desportiva
Programa haat ne’e mak hanesan apoiu organizasaun juventude sira, liu-liu fundu operasionál juventude sira-nian, formasaun ba Parlamentu Foin-sae ne’ebé hala’o ona dala-rua iha tinan ne’e, programa jornál nasionál juventude sira-nia ne’ebé sei halo iha fulan-novembru nia laran no loron 12 novembru ne’ebé mak sei komemora loron nasionál joventude no Masacre Santa Cruz, ba ida seluk mak loron 12 agostu hanesan loron mundial juventude.
“Ita mós halo parseiru ho UNDP, UNICEF, World Vision no PLAN International ba apoiu iha planeamentu planu asaun nasionál joventude no iha mos programa seluk mak partisipasaun iha ASEAN, ita-nia joven sira ba partisipa iha atividade ne’ebé organiza husi ASEAN, ne’ebé sei hala’o iha Tailándia iha fulan-novembru nia laran,” nia akresenta.
Planu formasaun ne’e halo mós iha munisípiu hanesan formasaun regular ne’ebé liuhusi sentru juventude fó apoiu ba sira liuhusi fundu operasionál hodi organiza formasaun regulár hanesan língua, komputadór, edukasaun sívika, redusaun konflitu no lideransa ba formasaun sira ne’e konforme ba joventude sira mak organiza.
Aleinde ne’e, iha mós formasaun seluk ne’ebé mak MJDAK serbisu hamutuk Institutu Nasionál Kombate HIV/SIDA (INCIDA, sigla portugés) hodi fó formasaun kona-ba relasaun saudável.
“Formasaun ne’e halo atu hatán ba ita-nia nasaun ne’ebé ita-nia joven sira barak mak kaben sedu no hetan moras HIV/SIDA no balun komete ona droga, ho formasaun sira-ne’e espera sira bele iha koñesimentu oituan kona-ba ida-ne’e hodi bele redús númeru moras HIV/SIDA iha ita-nia rai,” nia tenik.
Husi rezultadu formasaun ne’ebé fó ba joventude sira mak sira iha koñesimentu no sira bele fahe ba joven sira seluk no ba iha joven sira ne’ebé kaben sedu mós komesa menus.
Nune’e mós, Koordenadora Gabinete Komunikasaun no Informasaun MJDAK, Aida Soares, agradese ba responsável mídia no jornalista sira tanba mai partisipa ona iha programa ne’e hodi rona no hatene serbisu sira iha MJDAK ne’ebé daudaun ne’e la’o hela .
“Objetivu husi ita-nia sorumutuk ne’e atu partilla informasaun no programa sira ne’ebé iha MJDAK nia inklui nia progresu sira. Agradese tanba ita-boot sira ho laran kma’an atende ona ami-nia konvite, hakarak hato’o ba ita-boot sira katak programa kafé hamutuk ne’e nu’udar programa anuál,” nia katak.
Partisipante atividade apresia inisiativa MJDAK nian no husu nafatin kolaborasaun serbisu regular, nune’e mós hato’o sira-nia prespertiva kona-ba serbisu instituisaun Governu.
Jornalista : Osória Marques
Editora : Julia Chatarina
