COVALIMA, 24 setembru 2024 (TATOLI) – Servisu Munisipál ba Administrasaun no Rekursu Umanu (SMARU) fó formasaun kona-ba jestaun administrasaun no jestaun arkivu uza sistema dijitál ba funsionáriu sira iha Covalima.
Diretór Servisu Munisipál Administrasaun Rekusu Umanu, José Manuel Gonçalves, hateten atividade ne’e parte ida atu hasa’e funsionáriu sira-nia koñesimentu iha área jestaun administrasaun no jestaun arkivu.
“Servisu munisipál fó formasaun ba funsionáriu, tanba ami observa katak serbisu jestaun administrasaun no jestaun arkivu la’o ona, maibé balun la’o ladún di’ak, presiza disponibiliza formasaun hodi hasa’e funsionáriu sira-nia koñesimentu iha área ne’ebé sira presta serbisu”, José Gonçalves dehan ohin.
Dirijente ne’e dehan formasaun ne’e hala’o durnate loron ida no la sufisente ba funsionáriu sira atu aprende, maibé importante mak fó ona formasaun nune’e sira iha ona koñesimentu uitoan.
Funsionáriu ne’ebé tuir formasaun ne’e hamutuk 49 mai husi Servisu munisipál Obra Públika, Servisu munisipál Seguransa Alimentár, Jestaun Merkadu no Turizmu no seluk tan.
Funsionáriu Administrasaun Covalima, Gonçalves Sarmento, dehan formasaun ba funsionáriu sira ne’e importante atu hasa’e sira-nia kuñesementu iha área ne’ebé sira presta serbisu ba.
“Ha’u hanoin formasaun durante loron-ida de’it la sufisente ba ami atu aprende, tanba ba futuru iha tan programa formasaun no presiza aumenta loron nune’e funsionáriu sira bele entende didi’ak kona-ba jestaun administrasaun no arkivu uza sistema dijitál, tanba daudaun ne’e ami uza sistema administrasaun ho manual”, nia sujere.
Jornalista: Celestina Teles
Editora: Maria Auxiliadora
