DILI, 24 setembru 2024 (TATOLI)–Sekretáriu Estadu Asuntu Toponomia no Organizasaun Urbana (SEATOU), Germano Santa Brites, husu ba populasaun sira atu kuidade hodi labele husik animál no treinu karreta-motorizada iha Esplanada Tasi-Tolu.
“Husu ba maluk sira labele uza fatin ne’e arbiru, tanba fatin ne’e relijiozu nian, fatin istóriku ba ita no ba futuru nasaun ida ne’e nian. Husu ba ema hotu-hotu, liuliu maluk sira-ne’ebé hela iha área Tasi-Tolu atu kuidadu fatin ho didi’ak, labele husik animál hanesan fahi, bibi, manu, kuda no karaun tama iha esplanada ne’e nia laran,” Sekretáriu Estadu Asuntu Toponomia no Organizasaun Urbana (SEATOU), Germano Santa Brites, hateten ba ba jornalista sira nakait ho individu balun ne’ebé koko kontinua tau roda iha Tasi-Tolu hodi halo treinu karreta no motor, iha Tasi-Tolu, tersa ne’e.
Sekretariu Estadu ne’e reforsa, se animál sira tama iha área ne’ebá, jestaun merkadu kuandu kaer no foti sasán sira-ne’e hanesan baibain sei lori no entrega hotu ba iha uma mahaon sira no la fó fila ba na’in.
“Se ita hatene na’in mak se ba kesi animál sira mos, Governu mos sei prega multa. Sé mak treinu karreta no motor iha ne’e mós ita la autoriza atu sira mai halo fatin ida-ne’e,” nia dehan.
Governante ne’e sujere ba ema hotu buka fatin atu treinu karreta no motor, tanba autorizasaun Diresaun Nasionál Transporte Terrestre atu treinu karreta no motor ne’e iha estasaun Hera ne’ebá, iha ne’e labele tanba fatin ne’e ema mai reza no halo devosaun.
Nia mós la autoriza atu kareeta hanesan tum-tum tama ba iha área espalanda Tasi-Tolu nian, maibé iha ema balun ne’ebé ulun moruk sei tama iha ne’ebá ne’e, autoridade sei detein hodi hetan multa.
“Ita halo hela kontrolu iha ne’e, sira seguransa iha ne’e, maibé la hatudu aan ba ita, sira sei foti medida kuandu kontra iha ne’e,” nia dehan.
Jornalista : Jesuína Xavier
Editór : Cancio Ximenes
