DILI, 25 setembru 2024 (TATOLI)–Xefe Departamentu Saneamentu iha Autoridade Munisipál Dili (AMD), Domingos dos Santos Soriano, hateten kada sesta-feira pesoál ekipa saneamentu AMD hala’o limpeza iha esplanada Tasi-Tolu hodi garante ambiente moos.
Reponsável ne’e hateten, AMD mós halo limpeza iha área Tasi-Tolu nian to’o iha João Paulo II nian, tanba Governu no igreja mós halo ona manutensaun ba fatin istóriku ne’e.
“AMD iha responsabilidade bo’ot ida iha ne’ebá no koloka tranporte balun iha ne’ebá hodi foti lixu ne’ebé ita-nia ema sira halo limpeza tau hamutuk hodi tula kedas,” Xefe Departamentu Saneamentu iha Auotoridade Munisipal Dili (AMD), Domingos dos Santos Soriano, ba Agência Tatoli, iha Matadoru.
Nia esplika, fatin Tasi-Tolu fatin ne’ebé dedikada ba eventu boot sira no Governu halo infraestrutura ida-ne’ebé di’ak, entaun ema hotu presiza kuidadu no AMD mós iha responsabilidade hodi halo limpeza.
Domingos dos Santos Soriano hateten, AMD halo limpeza iha área Tasi-Tolu nian ne’e iha kada loron sesta-feira semanalmente ne’ebé koloka ema pesoál saneamentu AMD nian hamutuk na’in haat (4).
Tuir nia, pesoál serbisu saneamentu AMD komesa iha tuku 07h00 to’o tuku 10h00 dadeersan halo limpeza iha área Tasi-Tolu to’o iha área João Paulo II nia okos ba.
Jornalista : Jesuína Xavier
Editór : Cancio Ximenes
