Jerente BNCTL husu benefisiáriu subsídiu apoiu atu halo kartaun ATM
DILI, 27 setembru 2024 (TATOLI)—Prezidente Komisaun Ezekutiva Banku Nasionál Komérsiu Timor-Leste (BNCTL), António Francisco Vitor, husu ba benefisiáriu programa subsídiu apoiu ba idozu no inválidu atu halo kartaun Atomatic Teller Machine (ATM), nune’e bele hafasil pagamentu.
“Ha’u husu kedas ba ferik-katuas sira atu halo kartaun ATM tanba sira bele hasai sira-nia osan fulan-fulan, maibé se sira laiha kartaun, sira tenke hein simu subsídiu dala-ida kada fulan-tolu, nune’e se sira iha asesu ba ATM, sira bele hasai osan iha kualkér tempu,” Jerente banku hateten ba Agência Tatoli, iha ninia knaar fatin, sukursál Mandarin, sesta ne’e.
Ekipa BNCTL halo pagamentu ba benefisiáriu sira iha kada suku, kada fulan-tolu, maibé hirak ne’ebé la konsege simu pagamentu bele bá direitamente iha sukursál banku.
“Klaru katak, se kliente sira iha sira-nia kartaun ATM rasik, sei fasilita sira atu hasai osan iha mákina ATM ne’ebé besik liután. BNCTL iha ATM 62 iha territóriu laran tomak, inklui fasilidade notifikasaun SMS atu kliente sira hatene bainhira subsídiu ne’e tama ba sira-nia konta,” nia akresenta.
Notísia relevante : INSS-BNCTL halo pagamentu ba subsídiu idozu na’in-228 iha Uma Uain-Leten
Prezidente Komisaun Ezekutiva husu ba kliente banku nasionál atu labele troka númeru kontaktu no bainhira troka númeru tenke fó hatene iha parte tékniku banku, nune’e bele hetan notifikasaun liuhusi SMS bainhira iha ona transferénsia iha konta banku.
“Ida-ne’e mós ajuda sira atu hatene katak prosesu tranzasaun ne’e hala’o husi konta rasik, tanba tranzasaun ne’ebé sala bele akontese,” nia hato’o.
BNCTL hahú iha marsu 2024 rejista ona kliente hamutuk na’in-15.000 ne’ebé hanesan benefisiáriu ba programa subsídiu apoiu ba idozu no inválidu, utiliza ona kartaun P24, husi númeru ema na’in-120.000 ne’ebé simu ona subsídiu ho totál $86.023.178 tuir dadus husi Institutu Nasionál Seguransa Sosial (INSS).
Antes ne’e, Konsellu Ministrus aprova ona alterasaun dahuluk ba lei númeru 53/2022, 20 jullu, ne’ebé aprova ona rejime legál kona-ba defisiénsia no pensaun sosiál sira ho idade boot iha rejime seguransa sosiál la’ós kontributivu, no mós deklara katak subsídiu sira fahe tuir kategoria idade, kategoria dahuluk mak idade tinan 60-69 simu $60, kategoria daruak ho idade tinan 70-79 simu $80, no kategoria datoluk ho idade tinan 80 no liu sei simu $100.
Jornalista : Osória Marques
Editora : Julia Chatarina
