DILI, 30 setembru 2024 (TATOLI)–Xefe Departamentu Jetaun Merkadu iha Autoridade Munisíu Dili (AMD), Joaquim B. M. Belo, informa viatura Triton no kamioneta ba operasionál servisu jestaun merkadu liuliu kontrolu vendedór sira-ne’ebé faan iha espasu públiku iha kapitál ne’e, agora kondisaun aat no seidauk halo reparasaun.
“Ami-nia karreta aat tanba laiha manutensaun, besik semana rua ona. Hanesan orsamentu ba diresaun jestaun merkadu menus tebe-tebes hodi halo reparasaun ba viatura sira-ne’e,” Xefe Departamentu Jetaun Merkadu iha Autoridade Munisipa Dili (AMD), Joaquim B. M. Belo, hateten ba Agência Tatoli, iha Faról, segunda ne’e.
To’o agora, responsável seidauk bele orienta membru jestaun merkadu sira ba iha terrenu hodi kontrola vendedór sira iha espasu públiku sira iha kapitál Dili, oinsá sira hala’o kna’ar ba servisu jestaun merkadu nian.
Nia dehan, jestaun merkadu seidauk halo serbisu tanba ne’e mak daudaun ne’e sai difikuldade ba jestaun merkadu ba iha iha terrenu.
“Ita bele sai ba terrenu, maibé óleu bele menus no gripa iha dalan, tanba ne’e laiha orsamentu atu hadi’a. Ha’u-nia proposta hato’o ona ba superiór sira, maibé seidauk iha resposta,” nia hateten.
Vendedór sira daudaun ne’e faan livre hela iha fatin públiku sira iha kapitál Dili hanesan hahú fali faan nu-laloir iha tasi ibun Pantai Kelapa, Jardin Motael, Jardin Largo de Lecidere, antigun merkadu Comoro no Rotunda Comoro.
A;einde ne’e, nia mós lamenta ba funsionáriu sira iha AMD liuliu jestaun merkadu nian ne’ebé kontinua ho saláriu kiik, maske servisu kle’ur ona iha instituisaun ne’e.
“Sira tama founsálariu di’ak maibé sira-ne’ebé tama uluk ne’e salariu $130 nafatin to’o mate,” nia dehan.
Jornalista : Jesuína Xavier
Editór : Cancio Ximenes
