MAPPF apoia tratór tula sai komunidade nia hare iha Uatucarbau-Uatulari
VIQUEQUE, 03 outubru 2024 (TATOLI)- Servisu Ministériu Agrikultór Pekuária, Peskas no Floresta (SMAPPF) munisípiu Viqueque, apoia ona tratór hodi tula sai komunidade nia hare ne’ebe hetan afeta husi inundasaun iha postu Uatucarbau no Uatulari.
“Akontese udan bo’ot foin lalais iha loron 18 Setembru rezulta bee mota estraga komunidade sira nia-hare ne’ebé ko’a no balu sama ona. Nune’e ami distribui tratór bo’ot unidade haat ho kombustivél hodi ajuda lalin komunidade sira nian hare iha postu Uatulari no Uatucarbau”, Diretór SMAPPF munisípiu Viqueque, Olivio Soares Freitas, hateten ba jornalista sira, iha ninia kna’ar fatin Beloi, ohin.
Daudaun ne’e tratór boot sei iha postu Uatulari no Uatucarbau hodi ajuda tula-sai komunidade sira nian hare ne’ebé sei iha natar laran.
“Komunidade afetadu iha Uatucarbau hamutuk uma-kain 60 no iha Uatulari nian mak to’o agora sei rekolla, depois rekolla hotu maka ami fó sai ba públiku”, nia afirma.
Ho kondisaun ne’e, nia dehan iha tinan oin, MAPPF sei distribui hare fini ba komunidade sira-ne’ebé foin lalais udan estraga atu sira bele kuda iha sira nian natar.
Iha fatin seluk, Xefe Suku Irabin de Baixo, Postu Uatucarbau, José Baptista do Carmo, haktuir, daudaun ne’e MAPPF koloka tratór bo’ot unidade ida maka ajuda tula komunidade sira nian haree ne’ebé sama hotu ona.
“Tratór boot ida maka agora ajuda tula ita-nia komunidade sira-nia hare ne’ebé iha natar laran bá sira-nia uma. Ida-ne’e hanesan fasilita ona ita-nia agrikultór sira, tanba natar laran sei bokon karreta atu ba tula mós labele, entaun ho tratór maka bele tula”, nia afirma
Notísia relevante:Laiha morru protesaun, mota Irabere estraga agrikultór Uatucarbu nia hare
Jornalista : Vitorino Lopes da Costa
Editór : Florencio Miranda Ximenes
