DILI, 04 outubru 2024 (TATOLI)–Prezidente Interinu Autoridade Munisípiu Dili (AMD), Francisco dos Santos, hateten bainhira akontese ahi han lixu sira ne’ebé fakar iha lixeira Tibar ne’e, autoridade konsege kontaktu autoridade Protesaun Sivil, Autoridade Munisipál Liquiça no AMD rasik ho Bombeiru hodi halo kedas atuasaun.
Notísia Relevante: Reprezentante povu iha PN preokupa ho poluisaun ahi-suar husi lixeira Tibar
“Ahi han iha loron 01 outubru 2024 pur volta tuku 13h30 hanesan ne’e, maibé ekipa iha ne’ebá kontatu mai munisipiu Dili, ha’u koordena no liga ba iha Autoridade Protesaun Sivil hatun kedas ekipa Bombeiru ba iha ne’ebá. Inséndiu ne’e kauza husi fugete ruma ne’ebé rebenta rasik tanba rai manas no ajuda anin boot hodi espalla ahi hada’et ba-mai,” Prezidente Interinu AMD, Francisco dos Santos, hateten ba Agência Tatoli, iha Caicoli. dehan.
Nia hateten, iha ekipa Bombeiru Dili no Liquiça no Autoridade Protesaun Sivil ho ekipamentu hanesan eskavatór sira kontinua kombate ahi iha ne’ebá.
Iha fatin hanesan, Jerente Unidade Projetu Residu Sólidu Urbana iha Autoridade Munisípiu Dili (AMD), Joanito da Costa Ribeiro, informa poluisaun ahi-suar husi ateru lixeiru Tibar ne’e akontese tanba kauza husi lixu sira-ne’ebé fakar iha iha ne’ebá prodús gas rasik hamosu inséndiu.
“Iha loron 01 outubru 2024 akontese ahi-suar makkas ne’e ita labele atua, tanba bainhira ahi lakan ne’e kauza husi lixu ne’e rasik prodús gas rasik nomós telefone nia pila aat sira-ne’e hamutuk ho lixu, aki-been ne’ebé hamosu inséndiu iha lixeiru Tibar,” nia dehan.
Joanito da Costa Ribeiro esplika, ahi komesa han iha parte kiik-oan ida maibé anin boot mosu haeasan Tornado ne’e mak espalla ahi hodi han mohu kedas lixu sira-ne’ebé fakar iha lixeira Tibar ho luan ektare 11 ne’e.
“Anin Tornado ne’e lori ahi lakan ba iha ektare 11 lixeira Tibar nian. Kuaze ektare 11 ne’e, ahi han totál. Ita labele halo buat ida. Saida mak ita halo iha momentu ne’ebá mak ita haruka komunidade ne’ebé hili foer ho valór ekonómiku no operadór tenke sai husi fatin ne’ebá,” nia dehan.
Nia relata, iha loron tuir mai ne’e kedas AMD kontatu diretamente ba iha ne’ebá no lori kedas ekipamentu hodi hateru rai hodi hamate ahi-lakan ne’e.
“Hela de’it metade metru kuadradu hanesan mak ahi kontinua lakan. Ita-nia operadór sira kontinua kombate iha ne’ebá ohin dadeer kedas,” nia dehan.
Jornalista : Jesuína Xavier
Editór : Cancio Ximenes
