COVALIMA, 08 Outubru 2024 (TATOLI) – Governu sentrál haruka funsionáriu na’in-60 hodi presta sira-nia serbisu iha administrasaun munisípiu Covalima, informa Diretór Servisu Munisipál ba Administrasaun no Rekursu Umanu, José Manuel Gonçalves.
Funsionáriu sira ne’e mai husi gabinete Vise-Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária na’in-20, Vise-Ministru Administrasaun Estatál (MAE) na’in-haat, Sekretáriu Estadu Dezenvolvimentu Lokál na’in-28, Sekretáriu Estadu Kooperativa na’in-hitu no Sekretária Estadu Igualdade ida.
“Ita iha funsionáriu destakamentu husi Governu sentrál ne’ebé ohin sira mai aprezenta aan ona no hein atu koloka balun bá presta serbisu iha Servisu Munisipál sira, balun bá postuadministrativu hitu”, José Manuel Gonçalves informa ohin.
Dirijente ne’e dehan molok atu koloka funsionáriu sira ne’e tuir nesesidade munisípiu nian, presiza hein karta despaixu husi Prezidente Autoridade Munisipál Covalima, Miguel Armada Cardoso.
Funsionáriu destaka husi nasionál mai munisípiu ne’e sei apoia serbisu iha administrasaun ne’ebé koloka bá iha Servisu Munisipál ba Asaun Sosiál, Servisu Munisipál ba Jestaun Merkadu no Turizmu no balun apoiu serbisu iha área tékniku iha postu administrative sira.
Tuir dadus, funsionariu públiku ne’ebé hala’o knaar uha Servisu Munisipál sira no iha administrasaun postu administrativa iha Covalima hamutuk 323, ajente administrasaun 45, kazuál 200-resin.
Ho dadus funsionáriu ne’ebé iha, Servisu Munisipál ba Rekursu Umanu Covalima nafatin halo rekrutamentu ba pesoál sira iha área enjeñeiru sivíl no arkitetu hamutuk 12, tanba Servisu Munisipál ba Obra Públika no ba Planu Dezenvolvimentu Integradu falta rekursu atu monitoriza implementasaun projetu ualu. Nune’e, garante empreza atu implementa projetu tuir dezeñu ne’ebé iha.
Funsionária destakada husi Seskretaria Estadu Kooperativa, Leonora Perreira, dehan sira na’in-hitu mak sei apoia serbisu sekretaria nian iha Covalima, tanba daudun ne’e iha de’it funsionáriu na’in-tolu.
“Ami hala’o serbisu iha ne’e iha área produsaun hanesan kuda Bafo no halo akompañamentu ba kooperativa iha Covalima iha produsaun no kréditu ho durasaun kontratu durante tinan ida, depende ami-nia dezempeñu ”, nia informa.
Notísia relevante: Covalima hein desizaun hodi implementa Lei Podér Lokál-Desentralizasaun Administrativa
Jornalista: Celestina Teles
Editora: Maria Auxiliadora
