DILI, 10 outubru 2024 (TATOLI)—Empreza sira entrega ona projetu reabilitasaun ba toilet públiku iha merkadu Manleuana no Taibesi ba Autoridade Munisípiu Dili (AMD).
“Projetu reabilitasaun ba merkadu Manleuana no Taibesi ne’ebé orsamenta husi Ministériu Komérsiu no Indústria (MKI), empreza sira entrega ona mai AMD,” Prezidente interinu AMD, Francisco dos Santos, informa ba Agência Tatoli, kinta ne’e.
Dezeñu sira prepara husi AMD hodi entrega ba iha MKI hodi halo prosesu aprovizionamentu no kontrata empreza sira.
Notísia relevante : Reabilitasaun toilet públiku iha merkadu Manleuana atinje ona 100%
Prezidente interinu dehan, empreza halo tuir pedidu AMD nian hodi negosiante sira utiliza, maibé merkadu Taibesi nian seidauk di’ak, tanba ne’e husu atu hadi’a.
AMD mos autoriza ona negosiante sira iha merkadu sira ne’e hodi bele utiliza haris fatin públiku, maibé uza ho kuidadu ba longu prazu.
“Fatin ne’e halo ba imi, imi uza hanesan imi-nia rasik, uza didi’ak, tanba bainhira a’at imi rasik mak sei susar,” nia hameno.
AMD simu termu entrega merkadu Taibesi nian hodi negosiante sira presiza uza haris públiku bainhira hala’o atividade iha merkadu sira ne’e.
Iha sorin seluk, Diretór empreza Reynazhunior Unip. Lda, Jucelino de Jesus Pereira, hateten, empreza konklui ona reabilitasaun toilet públiku iha merkadu Manleuana no entrega ona ba AMD.
“Ekipa Ministériu Komérsiu no Indústria ba halo verifikasaun tuir dezeñu iha loron 02 outubru liubá, tanba ne’e mak ami entrega ona,” Jucelino de Jesus, haktuir.
Iha sorin seluk, Diretór empreza Walgen Walter 10 Unip. Lda, Walter Martins, hateten: “Ami entrega obra ne’e ba MKI no ADM mak entrega fali ba Jestaun Merkadu”.
Termu entrega ba reabilitasaun toilet públiku iha merkadu Taibesi no Manleuana hala’o iha loron 09 outubru 2024.
Jornalista : Jesuína Xavier
Editora : Julia Chatarina
