COVALIMA, 10 Outubru 2024 (TATOLI) – Komandu Polísia Nasionál Timor-Leste (PNTL) Covalima fó ona orientasaun ba eskuadra postu hitu atu partilla informasaun kona-ba atividade Konsellu Polisiamentu Komunitáriu (KPK) no Konsellu Seguransa Munisipál (KSM) iha postu administrativu sira.
Komandante PNTL Covalima, Superintendente Polísia Calisto Gonzaga, dehan komandu seidauk forma Konsellu Seguransa Munisipál no fó pose ba membru KPK, tanba Timor-Leste foin simu vizita husi Papa Francisco.
“Tuir loloos ita kria ona Konsellu Seguransa Munisipál, maibé iha semana kotuk ha’u orienta ona eskuadra sira atu partilla informasaun kona-ba atividade KPK no KSM”, Calisto Gonzaga dehan iha Santa Rosa, ohin.
Covalima iha postu administrativu hanesan Fatululik, Fohorem, Fatumea, Tilomar, Maucatar, Suai no Zumalai ho nia suku 30, maibé PNTL seidauk estabelese KPK iha suku 14.
Molok ne’e, iha loron 19 Marsu liubá, Komandu PNTL Covalima hamutuk ho autoridade diskute ona estabelesimentu KSM hodi prevene konflitu sosiál iha munisípiu.
Kriasaun KSM relasiona ho polítika Governu atu dezenvolve Suai Supplay Base, aeroportu, portu no autoestrada, tanba kestaun seguransa presiza envolve ema hotu hodi garante estabilidade.
Knaar no responsabildade KSM mak lidera enkontru KSM, halo koordenasaun parseiru serbisu ho programa Polisiamentu Komunitáriu hodi organiza enkontru regulár kada fulan tolu no halo fiskalizasaun ba serbisu KPK.
Membru KSM kompostu husi Prezidente KSM mak Komandante PNTL Covalima, Prezidente Autoridade Munisipál ne’ebé parseria ho veteranu sira, diretór servisu munisipál no diretór delegasaun territoriál no administradór postu administrativu no xefe suku sira, nune’e bele halo prevensaun ba konflitu iha futuru.
Kona-ba KPK nia kompozisaun mai husi líder komunitáriu no konsellu suku sira, reprezentante veteranu sira, líder juventude no Ofisiál Polísia Suku. Atividade KPK mak identifika problema: halo enkontru fulan-fulan, halo planu asaun ba atividade sira no rezolusaun no prevensaun. Rezolve problema: ezekuta planu asaun no relata relatóriu: avalia impaktu husi asaun sira.
Notísia relevante: PNTL Covalima hakarak kompleta estabelesimentu membru KPK iha tinan ne’e
Jornalista: Celestina Teles
Editora: Maria Auxiliadora
