DILI, 11 outubru 2024 (TATOLI)—Autoridade Munisípiu Dili (AMD) daudaun ne’e presiza tan ema na’in-20 atubele lori karreta raut lixu iha kapitál.
Xefe Departamentu Servisu Água no Saneamentu iha AMD, Domingos dos Santos Soariano, hateten, empreza China Harbour daudaun ne’e buka hela ema atu fó formasaun, molok lori karreta modernu raut lixu. Antes ne’e empreza fó ona formasaun ba ema 20-resin, maibé ema na’in-hitu de’it mak liu, tanba ne’e mak agora kompaktór hitu de’it mak la’o hodi raut lixu.
“Empreza China Harbour no Pax daudaun fó hela formasaun ba kondutór sira, husi sira-nia esperiénsia bele uza karreta kompaktór. La sala kondutór lori karreta kompaktór sira ne’e sei presiza tan ema liu 20 inklui mos karreta sira seluk no tiga roda,” Xefe Departamentu Servisu Água no Saneamentu iha AMD, Domingos dos Santos Soariano, informa ba Agência Tatoli, iha ninia knaar fatin, Matadouro, sesta ne’e.
Notísia relevante : AMD koloka pesoál limpeza 200-resin rekolla lixu iha kapitál Dili
AMD hakarak empreza bele aselera prosesu ne’e hodi fó formasaun ba motorista sira, tanba sira distribui ona lixeiru barak iha kapitál hodi komunidade bele soe lixu iha nia fatin.
“Ita hare Dili laran lixu barak loos no kaixote lixu sira ne’e tau ona iha fatin barak,” nia akresenta.
Empreza sira ne’ebé raut lixu manuál foti mak lixu sira ne’ebé ema soe iha liur de’it, maibé kaixote lixeiru sira ne’e kareta modernu ne’e mak raut ka foti ba soe iha Tibar.
Tuir dadus, karreta kompaktór ka kareta modernu raut lixu ne’e hamutuk 26, hitu halo operasaun raut lixu no 19 mak seidauk iha kondutór hodi halo operasaun raut lixu sira iha kapitál.
Jornalista : Jesuína Xavier
Editora : Julia Chatarina
