DILI, 11 outubru 2024 (TATOLI)—Xefe suku Comoro, Eligio José Marçal, hateten, parte suku aprezenta ona keixa ba Polísia Nasionál Timor-Leste (PNTL) atu investiga suspeitu ba kazu sunu kaixote lixeiru iha klínika oin iha suku Comoro.
“Hanesan Autoridade lokál, ha’u halo ona aprosimasaun ba na’in loja xineza besik iha fatin ne’ebá hodi haree gravasaun vídeo vijilánsia ba akontesimentu ema sunu kaixote lixu ne’e. Iha meudia ne’e kedas ha’u bá Ofisiál Polísia Suku no Eskuadra Dom Aleixo nian, ba Sesaun Investigasaun atu hato’o keixa ida iha ne’ebá hodi ekipa bele halo investigasaun,” Autoridade suku informa ba Agência Tatoli, iha ninia knaar fatin, Comoro, sesta ne’e.
Notísia relevante : Ema deskoñesidu sunu kaixote lixu haat iha Comoro
Iha gravasaun vídeo,m fó sai katak iha ema na’in-rua pasa iha fatin akontesimentu iha madrugada.
“Sira la’o olahraga no soe foer, ne’e kamera ladún kapta. Maibé, maluk na’in-rua iha hela prosesu investigasaun,” nia akresenta.
Xefe suku ne’e garante katak nia parte kontinua serbisu hamutuk ho Xefe aldeia no Delegada sira atu fó avizu ba komunidade hodi halo limpeza iha sesta-feira no so’e foer iha kalan tuku hitu to’o tuku hitu dadeer.
Eligio José Marçal rekoñse iha populasaun balun seidauk iha konsiénsia di’ak atu soe foer iha fatin, tanba balun kontinua soe iha rai, maski iha ona kaixote lixu.
Iha sorin seluk, Prezidente interinu Autoridade Munisípiu Dili (AMD), Francisco dos Santos, hateten, AMD haruka ona karta ida ba PNTL atu kontinua investiga kazu ne’e tanba konsidera hanesan atu krime.
“Propriedade Estadu ne’ebé komunidade sunu ne’e krime, ami laiha meiu ida ba ida-ne’e. Ami meiu ida mak ne’e, ami halo hela karta ida ba PNTL atu buka autór no halo investigasaun. Ami ho Jestaun Merkadu buka solusaun mak rezolve problema lixu. Krime ne’e lala’ok ketak ida,” nia hato’o iha Caicoli.
Jornalista : Jesuína Xavier
Editora : Julia Chatarina
