DILI, 15 outubru 2024 (TATOLI)—Komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál (PN), rekomenda ba Ministériu Saúde (MS) atu kompleta destakamentu profisionál saúde iha sentru no postu saúde sira iha munisípiu Ermera,
“Rekomenda ba Ministériu Saúde atu kompleta destakamentu profisionál saúde iha sentru no postu saúde sira hodi fó atendimentu másimu ba populasaun sira,” refere relatóriu fiskalizasaun husi komisaun F ne’ebé Agência TATOLI asesu, segunda ne’e.
Foin lalais ne’e, komisaun F ne’ebé lideradu husi Prezidente Komisaun F, Maria Gorumali Barreto ho Deputadu membru komisaun hala’o fiskalizasaun ba iha sentru no postu saúde sira iha munisípiu Ermera.
Tuir relatóriu fiskalizasaun haktuir, vizita fiskalizasaun iha munisípiu Ermera ne’e, komisaun aprezenta konkluzaun ba área saúde komisaun identifika katak maske menus rekursu umanu no menus disponibilidade fasilidade iha sentru no postu saúde sira, serbisu atendimentu saúde kontinua la’o normál.
Sentru saúde Railaco
IHa sentru saúde Railaco ne’e, sei menus profisionál saúde iha postu saúde sira, falta apoiu transporte operasionál hodi asegura implementasaun programa saúde nian, no kondisaun rezidénsia ba profisionál saúde ne’ebé aat, uza hela rezidénsia antiga ne’ebé konstrui iha tempu Indonézia iha senrtu saúde Railaco no postu saúde Railaco Leten.
Laiha ekipamentu médiku hanesan oximeter, estetoskópiu liman, dasi tetu-todan, dressing set, otoskopia, glucometer, RASG, nebulizador no box for Paking.
Kuantidade fornesimentu ai-moruk la tuir pedidu rekizisaun ne’ebé fasilidade saúde submete ba serbisu munisipál saúde.
Sentru saúde Gleno
Destakamentu profisionál saúde iha sentru no postu saúde seidauk prienxe rekezitu ne’ebé determina iha diploma legál, postu saúde tolu seidauk destaka profisionál saúde.
Laiha motorizada ba profisionál saúde hodi hala’o programa saúde iha área remota, menus apoiu kombustível.
Sentru saúde Letefoho
Destakamentu rekursu umanu sei menus iha sentru saúde no postu saúde sira no laiha kanalizasaun bee-moos ba sentru saúde Letefoho.
Estrada ne’ebé liga ba sentru saúde ho kondisaun aat no rezidénsia ba profisionál saúde kondisaun aat.
Sentru saúde Hatolia A
Menus destakamentu profisionál saúde iha sentru no postu saúde sira hodi difikulta implementasaun no atendimentu ba komunidade.
Laiha karreta operasionál hodi apoiu atividade saúde, menus kombustível, edifísiu sentru saúde Hatolia A ho kondisaun aat no sala sira ho espasu kloot.
Iha parte seluk, komisaun F rekomenda mós ba Ministériu Saúde no Serbisu Munisipál Saúde atu propoin iha OJE 2025 ba reabilitasaun no konstrusaun rezidénsia ba profisionál saúde sira.
Komisaun F rekomenda ba Institutu Nasionál Farmásia no Produtu Médiku atu asegura no garante distribuisaun medikamentu no ekipamentu médiku atu sentru no postu saúde sira iha munisípiu Ermera.
Rekomendasaun ikus ba MS no Serbisu Munisipál Saúde atu asegura apoiu transporte no kombustível ba atendimentu no implementasaun programa saúde iha nível munisipál.
Enkuantu, relatóriu fiskalizasaun ne’e meza Parlamentu Nasionál halo ona distribuisaun ba Deputadu sira no hato’o mós kópia ba Governu liuliu MS atu bele tau atensaun.
Jornalista : Nelson de Sousa
Editór : Cancio Ximenes
