Komisaun G husu Governu halo pagamentu projetu komunitária ba konstrusaun eskola
DILI, 15 outubru 2024 (TATOLI)—Vise Prezidente Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), Gabriel Soares, husu Ministériu Edukasaun (ME) atu halo pagamentu ba projetu komunitáriu ba konstrusaun eskola balun iha munisípiu Ainaro ho Manatuto ne’ebé nia konstrusaun finaliza ona, maibé to’o agora seidauk kompleta halo pagamentu.
Notísia Relevante: Projetu komunitáriu ba konstrusaun eskola 202 sei konklui iha tinan ne’e
“Ami-nia fiskalizasaun komisaun nian iha semana liu-ba ne’e identifika, iha Ainaro ho Manatuto to’o agora, projetu komunitáriu finaliza ona maibé pagamentu ba 10% ne’e seidauk. Entaun, prezudika badaen no grupu sira labele entrega xave ba iha diretór eskola atu utiliza saladeaula ne’e,” Nia hateten ba jornalista sira iha resintu Parlamentu Nasionál, tersa ne’e.
Ba projetu komunitária ne’e iha Governu Konstitusionál da-ualu (VIII) ne’ebé tau orsamentu iha tinan 2021 ho orsamentu iha fundu ba kategória transferénsia públika pur volta millaun $22 hodi halo konstrusaun eskola sira.
Ba ida-ne’e. nia dehan, konstrusaun balun la’o di’ak tebes no inaugura ona no balun utiliza ona husi estudante sira.
Projetu komunitária ne’e fó diretamente ba komunidade forma grupu no fó ba grupu mak ezekuta projetu ne’e.
“Iha Ainaro ho Manatuto to’o agora ne’e, projetu ramata ona maibé pagamentu ba 10% ne’e seidauk, entaun prezudika badaen no grupu sira labele entrega xave,” nia dehan.
Nia dehan, pagamentu 10% nian ne’ebé seidauk hala’o ne’e mai kedas husi tinan 2021 to’o agora.
Tanba ne’e, nia husu ba Ministériu Edukasaun tenke tau atensaun ba asuntu ne’e tanba projetu konklui ona maibé osan ba 10% nian ne’en ema grupu sira halo konstrusaun ne’e halo pagamentu hodi entrega xave Xafe atu bele utiliza saladeaula ba estudante sira.
Durante fiskalizasaun, nia dehan, razaun la selu 10% noian ne’e tanba sira husi ME iha ekipa enjiñeiru ketak no husi Ajénsia Dezenvolvimentu Nasionál (ADN) mós hanesan.
Nune’e, presiza parte rua halo verifikasaun ho didi’ak verifika didi’ak hamutuk, nune’e pedidu husi grupu mai iha ME labele falla. Se lae, parte ida falla prezudika ba grupu sira-ne’ebé mak kaer projetu ne’e.
Hanesan iha Ainaro no Manatuto kuaze eskola lubun ida 10% seida’uk halo pagamentu.
Jornalista : Nelson de Sousa
Editór : Cancio Ximenes
