Governu no komunidade hamatak Rabilau ho ai-hun aikakeu no sentru
AINARO, 17 outubru 2024 (TATOLI)–Governu liuhusi Sekretaria Estadu Floresta (SEF) hamutuk ho komunidade lokál no grupu voluntáriu sira kuda ai-oan hodi haleu ambiente Rabilau, iha ámbitu Festivál Kulturál Rabilau 2024, iha foho Rabilau, aldeia Ramori, suku Maubisse Vila, postu administrativu Maubisse, munisípiu Ainaro, ne’ebé realiza durante loron-tolu, hahú loron 16 to’o 18 outubru.
“Ami kontente tebes horiseik no ohin hodi fó apoiu másimu ba inisiativa Prezidente Repúblika nia inisiativa ne’ebé lansa Festivál Rabilau ho apoiu husi Governu. Ohin loron ami kuda ai-knanoik 90 tanba ai-knanoik segundu ne’e kompatível ho kondisaun naturál sira iha Rabilau,” Sekretáriu Estadu Floresta, Fernandino Vieira hato’o iha Rabilau, munisípiu Ainaro, kinta ne’e.
Nia dehan, inisiativa ne’e foti tanba SEF hakarak konvida sosiedade hamutuk atu tau matan no esplora rekursu naturál sira iha rejiaun ne’e, ne’ebé bele dada komunidade lokál no estranjeiru sira.
Notísia relevante : Sentru Saúde Maubisse rejista pasiente 45 durante Festivál Kulturál Rabilau
Xefe Juventude Rabilau, Adelino Mendoça Espírito Santo, simu apoiu husi SEF iha konstrusaun Rabilau.
“Ita fiar katak sosiedade iha ne’e sei la’o tuir prosesu konservasaun nian no ita mós kuda tanba laiha ai-hun iha ne’e. Ai-hun ne’e sai boot ona, ne’e mak ai-hun ne’ebé di’ak tebes, tanba mensajen sira-ne’e hotu ita sei tau matan didi’ak,” nia akresenta.
Grupu Juventude Rabilau lansa ai-hun 90 hamutuk ho Crus Vermelha Timor-Leste (CVTL), profesór, Igreja, no Guarda Ainaro Floresta inklui iha komunidade Rabilau mós kuda ai-hun 270 no muda besik Rabilau.
Jornalista : Osória Marques
Editora : Julia Chatarina
