UNTL lansa filme dokumentáriu “The Art of Teaching”
DILI, 17 outubru 2024 (TATOLI)–Universidade Nacional Timor Lorosa’e (UNTL), kinta ne’e, lansa filme dokumentáriu ho títulu “The art of Teaching” iha Auditória da Faculdade de Ciências Sociais da UNTL, Kampus Caicoli, Dili.
Filme dokumentáriu ne’ebé produtór Hermenegildo Olivieira no José M. F. Fonseca prodús ne’e, ho objetivu atu promove profisionalizmu dosente nian ne’ebé hakbesik aan no motiva estudante sira atu termina sira-nia estudu.
Produtór filme dokumentáriu, Hermenegildo Olivieira, hateten bainhira sei hala’o estudu iha Universidade Nacional Timor Lorosa’e (UNTL), nia laran monu ba autór ptofesór Marcelino Magno hanesan dosente ida, ne’ebé motiva tebe-tebes estudante sira konklui sira-nia estudu.
“Edukasaun iha Timor-Leste kontinua enfrenta problema, entaun filme dokumentáriu ne’e importante atu bele ajuda estudante no dosente sira iha prosesu aprendizajen,” Produtór ba filme dokumentáriu, Hermenegildo Olivieira, hateten ba Agência Tatoli, iha Kampus UNTL, Caicoli.
Nia relata, filme dokumentáriu ne’e hahú prodús iha marsu 2023 ne’e sein iha apoiu fundu husi ema ruma, maibé inisiativa voluntariamente hodi prodús no hetan apoiu husi autór prinsipál [dosente Marcelino Magno] hahú husi prosesu no finaliza filme dokumentáriu ne’e.
“Iha Timor-Leste, atendimentu ba estudante sira-ne’e barak liu ladún di’ak. Iha dosente balun ne’ebé trava duni estudante sira-nia estudu, tanba asuntu edukasaun asuntu ida-ne’ebé problemátiku. To’o estudante balun ne’ebé lakohi ba Kampus hodi hatutan sira-nia estudu tanba dosente ida-nia hahalok. Entaun, filme ne’e hatudu profisaun profesór ne’e mak oinsá,” nia dehan.
Nia garante, filme dokumentáriu ho durasaun minutu 27 ne’e sei ajuda no inspira partisipante sira hanesan estudante no dosente sira, no reprezentante Governu sira oinsá bele hadi’ak sistema edukasaun liuliu iha prosesu aprendizajen iha Timor-Leste.
Fonte husi filme dokumentáriu ne’e, Isaura Lemos de Deus, hateten filme dokumentáriu ne’e interresante tebes ba públiku katak estudante sira-ne’ebé iha vontade bele termina lalais sira-nia estudu.
“Liuhusi filme dokumentáriu ne’e, profesór Marcelino Magno hanesan profesór motivadór ida ne’ebé inspira profesór sira seluk liuliu dosente iha Timor atu bele banati tuir ezemplu ne’ebé nia halo hela,” nia dehan.
Profesór Marcelino Magno la lakon vontade no esperansa, hodi buka tuir ninia estudante sira-ne’ebé la akaba sira-nia estudu iha hakerek proposta no monografia, maibé nia ba buka tuir no enkoraja esrtudante sira atu konklui lalais.
“Profesór Marcelino Magno la’o buka tuir ha’u no enkoraja ha’u atu termina ha’u nia estudu. Momentu ne’ebá, ha’u para tiha tinan rua,” nia hateten.
Iha fatin hanesan, diretór Nasionál Ensinu Superiór, Higino Soares, hateten bainhira nia tun ba hasoru populasaun iha terrenu ne’e, ema barak kestiona prosesu aprendizajen UNTL nian ne’ebé kle’ur tebes tanba lori tinan hitu (7) mak estudante ida termina sira-nia estudu.
“Filme dokumentáriu ne’e hanesan ezemplu ida ita atu halo ka marka diferensa ida ba estudante sira no oinsa motiva estudante sira, hnesan ita hotu asiste no rona daudaun,” nia hateten iha nia diskursu.
Tuir nia, prosesu aprendizajen atu hotu mós depende ba iha kretatividade no esforsu estudante sira-nian hodi atinje objetivu.
Diretór ne’e garante, Ministériu Ensinu Superiór iha Governu Konstitusionál da-sia (IX) kontinua fó apoiu ba UNTL oinsa bele forma kualidade edukasaun liuhusi ativiadade aprendizajen.
“Ida-ne’e mekanizmu hasa’e kualidade no aproximasaun entre estudante no dosente. Estudante sira labele tauk hakbesik aan ba dosente sira,” nia hateten.
Jornalista : Jesuína Xavier
Editór : Cancio Ximenes
