DILI, 04 novembru 2024 (TATOLI)—Deputadu membru komisaun B trata asuntu Negósiu Estranjeiru, Defeza no Seguransa iha Parlamentu Nasionál (PN), Natalino dos Santos, lamenta ho kazu ema deskoñesidu tuda karreta iha área Triloka, postu administrative Baucau Villa, munisípiu Baucau, rezulta seguransa na’in-tolu (3) hetan kanek.
Notísia Relevante: Ema tuda karreta iha Triloka, rezulta membru seguransa na’in-tolu kanek
“Ne’e krime, lamenta tebes ho atetude sira hanesan ne’e. Entaun, husu PNTL bele halo atuasaun no halo investigasaun no kapturasaun ba autór sira-ne’ebé tenta halo asalta iha dalan. Autór tenke responsabiliza, rona ka’er tiha ona, tenke fó sansaun, tenke halo investigasaun atu buka loloos ninia motivu ne’e saida. Tanbasá halo asalta fali ofisiál superiór husi F-FDTL, ida-ne’e lamenta tebes. Husu instituisaun PNTL atu toma medida imediata no halo investigasaun direta,” Deputadu Natalino dos Santos hateten ba jornalista sira iha resintu PN, segunda ne’e.
Nia husu, PNTL Baucau atu investiga no kaptura suspeitu sira-ne’e hodi prosesa tuir dalan legál ne’ebé iha hodi fó sansaun todan, tanba ne’e lamenta ba atetude husi ema irresponsável ne’ebé hakarak halo pertubasaun orden públika.
Deputadu membru komisaun B ne’e husu líder komunitária hanesan xefe suku no xefe aldeia atu hamutuk ho Ofisiál Polisiamentu Suku (OPS) atu halo sensibilizasaun ka edukasaun sívika ba sidadaun sira oinsá kria situasaun hakmatek.
Nune’e, nia apela ba sidadaun sira atu kontribui ba pás no estabilidade iha kada suku no bairru hodi hamutuk lori dezenvolvimentu nasaun ne’e ba oin.
Antes ne’e, Komandante PNTL munisípiu Baucau, Superintendente Xefe António de Sá, esplika kazu refere akontese iha 31 outubru, iha tuku 23h00 kalan.
Vítima hanesan membru F-FDTL ho naran Laurentino “Ular” hetan kanek bainhira hamutuk ho família (oan na’in-tolu) viajen husi Dili ho transporte privadu xapa-matrikula A.24-841 TL, maibé to’o iha área Aubaca, Triloka, hetan tuda hodi rezulta karreta rahun iha parte vidru oin, kotuk no janela parte liman-loos nian.
“Problema hodi kalan ne’e mós ita-nia membru na’in-rua kanek, hanesan OPS ida hetan tuda iha nia ulun kanek no ida fali tuda iha parte hirus matan,” Komandante PNTL munisípiu Baucau ne’e hateten.
Membru PNTL hetan kanek bainhira to’o iha terrenu hodi halo atuasaun ba kazu refere, ne’ebé kompostu OPS suku Triloka no na’in-ida (1) no ida seluk nu’udar membru intelejénsia.
PNTL Baucau to’o kedas fatin akontesimentu hodi halo atuasaun no rekolla evidénsia hanesan karreta inklui kaptura suspeitu na’in-lima (5) ho autór prinsipál inisiál M ne’ebé detein ona iha sela komandu munisipál.
“Horikalan ita detein suspeitu na’in-rua (2) ho situasaun fragante delitu no na’in-tolu (2) seluk ohin dadeer mak kaer tán,” nia dehan.
Kazu refere sei kontinua prosesu investigasaun antes aprezenta ba Ministériu Públiku tanba utiliza arma branka ne’ebé evidénsia sira asegura ona iha komandu polísia Baucau.
Jornalista : Nelson de Sousa
Editór : Cancio Ximenes
