COVALIMA, 05 Novembru 2024 (TATOLI) – Ministériu Solidariedade Sosiál no Inkluzaun (MSSI), liuhusi Sentru Solidariedade Sosiál no Inkluzaun halo ona pagamentu hamutuk $401.064 ba benefisiáriu Bolsa da Mãe Kondisionál iha Covalima.
Pontu fokál Bolsa da Mãe Kondisionál Covalima, Nelson de Jesus, informa katak atividade ne’e nu’udar programa Governu ne’ebé kontinua implementa hahú husi 2008 bazeia ba dekretu-lei númeru 18/2012, 04 Abríl, ne’ebé kria subsídiu apoiu kondisionál Bolsa da Mãe.
Dekretu-lei ne’e hetan ona alterasaun iha Janeiru 2024 hodi halo mudansa ba montante orsamentu ba benefisiáriu-sira liuhusi dekretu-lei númeru 1/2024, 03 Janeiru, iha artigu 10 no artigu 11 ne’ebé deskreve mudansa montante orsamentu.
“Ho alterasaun dekretu-lei, pagamentu haree ba nivel edukasaun ne’ebé tuir loloos ita realiza iha Maiu, maibé foin lalais ita hala’o iha loron 29 Jullu ne’e, tanba prosesu pagamentu tinan ida dala-ida ba benefisiáriu Bolsa da Mãe Kondisionál”, Nelson de Jesus relata iha Suai Loro, ohin.
Pagamentu antes ne’e haree ba labarik, ne’ebé kada fulan hetan $5, maibé halo ona mudansa. Governu halo pagamentu bazeia ba nivel edukasaun no ba ensinu báziku primeiru siklu kada labarik simu $8, ensinu báziku sentrál $9 no ensinu sekundáriu $10 no kada família válidu de’it ba labarik na’in-tolu.
Kritériu atu asesu Bolsa da Mãe kondisionál mak sidadaun timoroan, presiza kartaun eleitorál, billete identidade, labarik sira-nia sertidaun batizmu, RDTL no aprezenta mós deklarasaun husi eskola hodi rekoñese labarik estudante duni.
Tuir dadus, benefisiáriu ne’ebé elejivel asesu ba Bolsa da Mãe Kondisionál husi postu administratrativu hitu hamutuk 2.763, ne’ebé mai husi Fatululik iha benefisiáriu 124, Fatumea 198, Fohorem 130, Maucatar 424, Tilomar 363, Suai 726 no Zumalai 798.
Rekorde katak Ministra Solidariedade Sosiál no Inkluzaun Sosiál, Verónica das Dores, lansa pagamentu Bolsa da Mãe Kondisionál iha 24 jullu iha Liquiçá.
Notísia relevante: MSSI lansa pagamentu Bolsa da Mãe Kondisionál faze dahuluk iha Liquiçá
Jornalista: Celestina Teles
Editora: Maria Auxiliadora
