DILI, 13 novembru 2024 (TATOLI)–Sekretáriu Estadu Dezenvolvimentu Lokál (SEDL), Mateus dos Santos Tallo, husu ba kargu xefe sira husi Autoridade Administrativu Ataúro atu sai servidór Estadu liuhusi atendimentu públiku ba populasaun.
Pedidu ne’e hato’o iha serimonia tomada pose ba diretór sira hanesan servisu Administrasaun no Rekursu Umanu, Delfin Borromeu de Araújo, Servisu Aprovizionamentu, Nehemia Belo, Ajnesia Planeamentu, António Ximenes, Servisu ba Apoiu Organizasaun Sosiedade Sivil, Jesunho Cabeças, Servisu Edukasaun, Pedro Lopes Cabeças, Servisu Saúde, Dano Pires de Souza, Servisu de Obras Públika, Transporte, Água, Saneamentu no Ambiente, Pedro Lopes Cabeças, Servisu Jestaun Merkadu no Turismu, Fanuel Batista, Servisu Asaun Sosiál, Protesaun Sivil no Jestaun Dezastre Natural, Cipriano Manuel Cabeças, no Servisu Rejistu, Notariadu no Servisu Kadastral, Arnaldo Gomes.
“Ho ida-ne’e ita-boot sira bele servisu di’ak liután povu Ataúro ho totál populasaun 12 mil. Atu pose hanesan konfiansa ida ba ita-boot sira. La’ós atu ukun, maibé atu serbí tuir kompeténsia ho tarefa sira-ne’ebé hatuur ona iha diploma ministeriál sira,” Sekretáriu Estadu ne’e hateten iha ninia diskursu, iha salaun INAP, Comoro.
Tuir Mateus dos Santos Tallo, Ataúro hein ema hotu nia matenek no lealdade ba prosesu dezenvolvimentu sosiu-ekonómiku Ataúro ninian.
Ataúro hanesan zona espesiál, tanba ne’e governante ne’e mos husu diretór sira asuntu sosiál atu bele iha vizaun ida luan hodi bele dezenvolve illa, atu bele iha prioridade ne’ebé aliña ho Governu sentrál nian.
Governu iha polítika ida ho ezisténsia Fundu Espesiál Dezenvolvimentu Ataúro, tanba ne’e tenke serbisu hamutuk ho autoridade munisípiu hodi bele ainje meta autoridade munisipiu nian.
“Ha’u dezafia ita-boot sira atu serbisu hamutuk liuliu serbisu Governu sentrál nian ne’ebé sempre fó asisténsia ba Ataúro,” nia dehan.
Prezidente Autoridade Munisipál Ataúro, Mateus Belo, hateten sira hakarak kargu xefia foun sira halo prestaun servisu ne’ebé di’ak-liu ba povu no la mai ho lema ida-ne’ebé dehan ukun maibé serbí ho fuan.
Nia esplika, serbí ho fuan katak fiar ba Maromak no fiar malu entre autoridade sira, iha unidade hodi serbisu hamutuk no asaun, tanba bele iha fiár ka unidade maibé importante liu asaun.
Iha fatin hanesan, Komisariu Funsaun Públika, José Talo, hateten ba kargu xefia hodi halo atendimentu di’ak ba povu atu povu bele sente ukun aan.
Jornalista : Jesuína Xavier
Editór : Cancio Ximenes
