PN aprova orsamentu MAE millaun $25,998
DILI, 14 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 $ 25,998,921 ba Ministériu Administrasaun Estatál (MAE) iha faze espesialidade ho votu afavór 42, kontra 20 no abstensaun rua (2).
“Ne’ebé, orsamentu ba MAE pasa,” Prezidente Parlamentu Nasionál, Maria Fernanda Lay, fó sai iha debate proposta OJE 2025 faze espesialidade ba loron datoluk iha sala plenária PN, kinta ne’e.
Proposta OJE 2025 ba MAE hamutuk $25,998,921 ne’e, hodi aloka ba saláriu vensimentu $11,756,843, bens no serbisu $11,680,373, transferénsia públika $2,203,705 no kapitál menór rihun $358.
Tuir dokumentu livru proposta OJE 2025 Planu Asaun Anuál Entidade públiku setór administrativu, ba tinan oin husi proposta orsamentu ne’e MAE sei finansia ba programa desentralizasaun administrativa no podér lokál ho sub-programa dezenvolvimentu lokál ho atividade ida (1), sub-programa desentralizasaun administrativa ho atividade haat (4), sub-programa planeamentu dezenvolvimentu integradu munisipál ho atividade lima (5), sub-programa instalasaun órgaun podér lokál ho atividade ida (1).
Programa funsionamentu no dezenvolvimentu instituisionál ho sub-programa rua (2) no atividade 12.
Programa inkluzaun sosiál ho sub-programa implementasaun NAP-GBV ho atividade ida (1).
Programa toponímia no organizasaun urbana ho sub-programa toponímia no atividade tolu (3), sub-programa ijéne no orden públika urbana ho atividade ida (1).
Programa dezenvolvimentu lokál ho sub-programa promosaun dezenvolvimentu lokál ho atividade lima (5).
Jornalista : Nelson de Sousa
Editór : Cancio Ximenes
