DILI, 18 novembru 2024 (TATOLI)–Governu liuhusi Diretór Jerál Dezenvolvimentu Lokál iha Ministériu Administrasaun Estatál (MAE), Vírgilio da Costa, husu ba Prezidente Autoridade Munisipál (PAM) atu kontrola no superviziona projetu hotu-hotu liuhosi Planeamentu Dezenvolvimentu Integradu Munisipál (PDIM) no Programa Dezenvolvimentu Suku (PNDS) iha munisipiu hotu-hotu.
Nia hateten, projetu balun ne’ebé laiha kuliadade hanesan projetu PNDS nian ba konstrusaun ponte iha suku Mau’ubu-Ermera nian no projetu PDIM ne’ebé la’o hela no alokasaun orsamentu ba projetu sira-ne’e ba iha PAM sira.
“Ita la’os halo intervensaun maibé ita halo rekomendasaun ba autoridade sira kona-ba preukupasaun públiku ba projetu sira oinsá mak bele ajusta ka responde, tanba sasán sira-ne’ebé ita halo ne’e nia benefisiu ba ita-nia komunidade. Ami-nia serbisu mak halo supervizaun, ami rekomenda nivel munisipiu ba kualidade kontrola,” Diretór Jerál Dezenvolvimentu Lokál iha Ministériu Administrasaun Estatál, Vírgilio da Costa, hateten ba Agência TATOLI, iha Bebora.
Nia dehan, projetu hotu-hotu Diresaun Jerál Dezenvolvimentu Lokál halo rekomendasaun, bainhira la la’o tuir dezeñu Kaderneta ba konstrusaun obra fízika sira.
“Responsável másima iha Prezidente Autoridade Munisipál sira-nian, tanba orsamentu sira ba projetu sira-ne’e. Ami iha nasionál sempre iha serbisu hamutuk no fiskaliza atu buat hotu la’o tuir nia planu. Ami divulga informasaun ba iha emprezáriu lokál sira atu bele sente sentidu pertense ba obra,” nia dehan.
Tanba, projetu sira-ne’ebé la’o iha munisipiu sira-ne’e garante benefisiu ekonómiku no kualidade moris ba populasaun atu hasa’e kreximentu ekonomia.
“Infraestrutura bázika ne’e mak ita dezenvolve di’ak iha munisipiu ida mak ikus mai bele ajuda setór agrikultura la’o no merkadu la’o no turizmu mos la’o di’ak,” nia dehan.
Jornalista : Jesuína Xavier
Editór : Cancio Ximenes
