DILI, 19 novembru 2024 (TATOLI)—Sekretaria Estadu Formasaun Profisionál no Empregu (SEFOPE) prevee ona orsamentu ba formasaun iha área kuidadu idozu (aged care) ba formadór 38 husi munisípiu sira inklui Rejiaun Administrativ Espesiál Oé-cusse Ambeno (RAEOA).
“Ita iha faze primeiru ne’e rihun $90-resin, ne’ebé mak ita prepara ba formasaun, espera ba oin ita sei hasai tan osan boot liu, nune’e bele ajuda formasaun,” Sekretáriu Estadu Formasaun Profisionál no Empregu, Rogério de Araújo Mendonça, informa hafoin asina nota kooperasaun ho Charles Darwin University, iha salaun SEFOPE, Caicoli, tersa ne’e.
Sentru formasaun balun estabelese ona iha munisípiu, tanba ne’e tenke prepara formadór sira ho kualidade.
“Iha fulan-haat ba kotuk ho lian, maibé ohin ita asina akordu ho Charles Darwin University ba área aged care, ida-ne’e ajuda filafali ita-nia joven sira-ne’ebé eskola iha medisina, maibé sira laiha oportunidade asesu serbisu, entaun liuhusi asina akordu ne’e bele loke formasaun iha área aged care tanba merkadu iha ne’ebá (Austrália) ne’e presiza tebes área ida-ne’e maibé ita-nia joven mak seidauk prense kritéria,” nia akresenta.
Notísia relevante : SEFOPE prevee rihun $500-resin konstrui sentru formasaun iha Covalima-Aileu
Sekretáriu Estadu konsidera, formasaun ne’e sei ajuda tebes formadór sira hodi kapasita no hasa’e koñesimentu, nune’e bele aplika iha kampu traballu.
“Nune’e, ami ko’alia tiha ona ho sira atu iha fulan-tolu ho balun ne’e sira mós prepara kualifikasaun ida-ne’ebé mak di’ak duni, se sira sai husi sentru formasaun ida-ne’e sei iha abilidade, koñesimentu, kompeténsia hodi hetan servisu, nune’e serví fali ema seluk. Sentru formasaun Universidade Carles Darwin loke iha Tasi-tolu, maibé ida-ne’e ba faze dahuluk nian no faze daruak sei espanda ba sentru formasaun akreditadu sira iha munisípiu sira,” nia tenik.
Iha biban hanesan, Konselleiru iha Charles Darwing University, Michael Hamilton, hateten, enkontru ne’e atu fó atu formasaun iha instánsia primeiru ho kuidadu idade no apoiu individuál, tanba ne’e.
“Ohin ami mai atu asina memorandu entendimentu ne’ebé hatudu katak ita bele hahú formasaun iha Dili no benefísiu ba Timor nian. Ami sei tau matan ba sira ne’ebé idade ona no tuir mai setór profisionál sira seluk ne’ebé determina husi ekipa no ami-nia priviléjiu mak atu hala’o formasaun ne’e hodi ekipa nia naran ka menus nomós hanesan entidade estranjeiru ida ami bele fó benefísiu ba Timor. Darwin besik tebes ho Timor no hanesan viziñu di’ak tebes no ami kontente tebes atu hela iha ne’e,” nia katak.
Jornalista : Osória Marques
Editora : Julia Chatarina
