BOBONARO, 21 novembru 2024 (TATOLI) – Prezidente Autoridade Munisípiu (PAM) Bobonaro, Alexandrino Pires, orienta negosiante xinés sira atu sobu varanda ne’ebé inventadu.
Prezidente Autoridade Munisípiu (PAM) Bobonaro, Alexandrino Pires, kinta ne’e ho ekipa tékniku Planu Dezenvolvimentu Integradu Munisipál (PDIM) tún direita ba merkadu Maliana hodi sukat espasu ne’ebé negosiante xinés no inklui Indonézia balu okupa hodi inventa no haluan varanda loja ba fa’an sasán nian.
Nia dehan, Governu obriga tenke sobu no muda tán ba kotuk, tanba durante ne’e empreza xineza sira ho inisiativa rasik inventa varanda hodi fa’an sasán mai to’o loja li’ur, okupa fali espasu ba parrajen karreta ho motorizada hodi difikulta ema la’o-ain atu halo movimentu.
Asaun ne’e PAM Bobonaro ho ekipa halo bazea ba orientasaun husi Sekretáriu Estádu Asuntu Toponímia no Organizasaun Urbana (SEATOU), Germano Santa Brites Dias, tanba konsidera besi hirak-ne’ebé negosiante xinés sira monta iha varanda ne’e inventadu no modelu hanesan fali manu-luhan.
Notísia relevante : SEATOU sobu barraka no fahi-luhan iha merkadu Maliana Vila
“Sobu besi husi ne’e ba to’o leten no kraik, halo pagar foun, loja sira iha-ne’e modelu ida de’it, tanba ema la’o araska loos, engrafamentu. Sé lakohi sobu SAETOU mai sobu hotu ba kotuk, tanba ita haree hanesan manu-luhan fali,” Alexandrino Pires hateten durante konversa ho negosiante xinés sira iha merkadu Maliana.
Líder masimu iha munisípiu Bobonaro ne’e, informa, daudaun ne’e ekipa tékniku PDIM sei halo levantamentu dadus, hafoin halo dezeñu ne’ebé sei diskute hamutuk ho negosiante estrajeiru sira.
“Ita hakarak ne’e pagar sira sa’e husi kraik ba to’o leten ne’e modelu ida de’it, nune’e haree kapas, rápidu, atu nune’e ema mai sosa mós hare di’ak, la’o fatin mós iha la dudu-malu tan,” Prezidente Autoridade Bobonaro ne’e fó hanoin.
Tuir observasaun Jornalista TATOLI iha terrenu nota katak, durante diskusaun negosiante estranjeiru sira hanesan nai’in ba loja Yangfa, City Plaza, loja Amar no seluk tan koopera ho autoridade munisípiu Bobonaro no prontu kumpre orientasaun Governu nia atu hadi’ak fila-fali varanda ho modelu uniforme ne’ebe kapaas.
Notísia relevante: MCI deteta empreza Xines ‘Yangfa’ tenta subar foos subsídiu
Jornalista: Sérgio da Cruz
Editór: Evaristo Soares Martins
