SINGAPURA, 02 dezembru 2024 (TATOLI)—Empreza 13 kompostu husi privadu 11 no empreza estatál ida no Institutu Públika ida aprezenta no promove produtu Timor iha ámbitu fórum komérsiu no investimentu ba dala-haat, durante loron-ida, iha Singapura.
Empreza estatál ida no Institutu Públika ida ne’ebé hetan konvite husi Governu hodi partisipa iha fórum ne’e mak hanesan Murak Rai Timor, Empreza Públika no Autoridade Nasionál Mineiru, Institutu Públika (ANM, I.P).
Na’in ba Kafé Atsabe ne’ebé partisipa mós iha fórum ne’e, Mariano da Costa Alves ‘Ameta’, hateten, kafé hanesan produtu lokál potensiál hodi halo importasaun, nune’e presiza halo promosaun.
“Dala barak ita fa’an kafé iha Timor-Leste ne’e hanesan komersiál todan, maibé ami-nia parte foka liu ba especiality, maibé agora kona-ba kafé ne’e iha rua hanesan merkadu komersiál no kafé especiality, entaun ami-nia halai liu ba kafé especiality, katak haree liu kafé ninia kualidade, nune’e bele hetan presu di’ak iha merkadu,” Mariano da Costa Alves, hateten ba Agência Tatoli, iha Otél Pan Pacific Singapura.
Notísia relevante : Governu Timor-Leste realiza fórum komérsiu no investimentu iha Singapura
Nia konsidera, kafé Timor sai produtu komersiál ne’ebé dala barak ema haree de’it ba nia presu tuir merkadu globál, tanba ne’e mak Kafé Atsabe hamriik hodi dezenvolve kualidade ba produsaun kafé.
“Entaun, iha eventu fórum internasionál ne’e Ministériu Komérsiu Indústria konvida ita hodi promove prosesu Kafé Atsabe ne’ebé halo durante ne’e. Ita espera katak bele iha parseria di’ak hodi sosa kafé no bele sai parseiru di’ak ba kafé iha Timor-Leste. Ida-ne’e hanesan investimentu ida ba marketing. Ita-nia espetasaun mak kafé produsaun di’ak no kualidade di’ak. Iha eventu ne’e oinsá mak ita bele hatene merkadu Singapura nian ba kafé ne’e. Ha’u mai la’ós atu buka kedas merkadu maibé dahuluk bele hatene lai lala’ok merkadu Singapura no apreende saida mak merkadu Singapura hakarak no ita koko oinsá tama ba merkadu ne’e,” nia akresenta.
Emprezáriu timoroan ne’e konsidera kafé iha Timor reprezenta kategoria tolu, hanesan identidade Timor iha ne’ebé de’it sempre lori, valór kulturál tanba bainhira bainaka vizita uma sempre oferese kafé no bele iha valór ekonomia ne’ebé bele hetan rendimentu husi produtu ne’e.
“Entaun ha’u-nia sujestaun mak Governu tenke tau osan boot iha Ministériu Agrikultura nune’e bele hasa’e produsaun no dezenvolve ninia kualidade iha merkadu. Ita tenke garante produsaun di’ak nune’e bele iha demanda husi merkadu. Aleinde ne’e Governu investe ba kualidade hodi bele hetan sertifikadu orijnál nune’e bele fasilita ita hodi esporta ba nasaun seluk,” nia katak.
Kafé Atsabe oferese produtu ho presu entre $2,50 to’o $20, ne’ebé daudaun ne’e iha ona kafetaria tolu iha Hudi-laran, Palapaço no Fomento, ho nia funsionáriu hamutuk 14 no na’in-ualu serbisu iha to’os kafé.
Jornalista : Osória Marques
Editora : Julia Chatarina
