DILI, 05 dezembru 2024 (TATOLI) – Servisu Edukasaun Munisípiu Dili, limita ona estudante sira ne’ebé transferénsia husi munisípiu seluk atu mai kontinua sira-nia estudu iha Dili, nu’udar kapitál nasaun nian.
“Númeru rasiu estudante iha munisípiu Dili ne’e aas tebes entaun ita mós limita ona atu simu estudante foun husi munisípiu seluk, eskola sei la direitamente atu simu estudante husi munisípiu seluk sein koñesimentu husi servisu edukasaun munisípiu Dili,” Xefe Departamentu Ensinu iha Edukasaun Munisípiu Dili, António Pereira Ximenes, hateten, iha knaar fatin, Comoro, kinta ne’e.
“No, iha ne’e konfirma ona espasu iha duni ona mak ita bele rekomenda atu simu maibé tenke ho razaun balun ne’ebé que nia mai eskola iha Dili. Nune’e ita bele kontrola númeru estudante iha munisípiu Dili, sira mai Dili ne’e mós ita sei haree ba razaun fundamentál saida, karik inan-aman servisu iha ne’e hotu, maibé ne’e mós razaun tenke klaru, maibé inan-aman iha munisípiu mak titip nia oan mai eskola iha Dili ne’e iha la simu”, Xefe Departamentu ne’e reitera.
Ezekutivu ne’e hatutan, bainhira eskola balun ne’ebé mak simu estudante sira husi munisípiu seluk seín koñesimentu husi servisu edukasaun munisípiu Dili, mak sei fó karta xamada.
“Dadus sei tama mai iha edukasaun munisípiu Dili nia, nune’e ikus mak ita identifika eskola sira simu transferénsia estudante husi Munisípiu seluk mak ita halo xaamada ba diretór eskola bazeia ba orientasaun ne’ebé ita fó hatene antes ona. Tanba transferensia ne’e kompeténsia husi servisu edukasaun munisípiu nia la’ós eskola sira,” nia dehan.
Aleinde ne’e mós, servisu edukasaun munisípiu Dili halo ona sensibilizasaun ba estabelesimentu ensinu sekundáriu sira atu simu estudante foun limitadu nune’e bele fó espasu ba estudante sira seluk kontinua mós estuda iha tékniku vokasionál.
“Ita halo ona sosializasaun ba eskola sira atu labele simu estudante sira ho taka matan maibé tenke simu limita, nune’e fó espasu mós ba estudante seluk sira atu ba kontinua iha tékniku vokasionál sira, tanba daudaun ne’e ESTV númeru menus inklui departamentu balun taka tanba estudante la iha,” nia dehan.
Xefe Departamentu Ensinu iha Edukasaun Munisípiu Dili, António Pereira Ximenes hateten, estudante sira ne’ebé mak antes ne’e eskola iha ensinu báziku filiál sira no atu kontinua ba ensinu báziku terseiru síklu ne’e nafatin kontinua iha ensinu báziku sentrál sira.
“Estudante ne’ebé remata iha eskola filial sira-ne’e tenke ba kontinua iha ninia sentru sira ne’ebé mak estabelese ona. Ne’e obrigatoriamente tenke ba iha ninia sentru sira, nune’e ita bele hamoris ona sentru ne’e, selae labarik sira remata iha filiál sentru ida-ne’e nia, ba kontinua fali iha sentru seluk ninia ne’e ladún di’ak,” xefe departamentu ne’e konsidera.
Ne’ebé, tuir nia, “Agora ita fó ona orientasaun ba eskola sira atu haree ba ida-ne’e, karik nia ba sentru seluk kecuali nia muda hela fatin tanba kestaun distánsia, ne’e bele. Maibé, ita la taka dalan ba mós sira ne’ebé hakarak ba iha eskola Katólika sira, ne’e ita fasilita deklarasaun”.
Autoridade Edukasaun Munisípiu Dili, António Pereira Ximenes akresenta, estudante sira nafatin kontinua iha kada sentru ne’ebé estabelese nune’e bele fó espasu ba sira aprende hodi tuir prosesu aprendizajen ho di’ak.
Katak, “Nia tenke ba sentru sira ne’ebé mak estabelese tanba atu halo ekilibriu ba númeru estudante sira, labele sentru ida númeru aas liu fali sentru seluk, entaun númeru estudante ida ne’ebé númeru aas ne’e prejudika ba prosesu aprendizajen tanba meza kadeira la too, númeru estudante iha sala laran barak demais”.
“Entaun ita atu ko’alia kona-ba kualidade ensinu no aprendizajen ne’e susar tebes, tanba ne’e mak ita dehan ona ba eskola sira, pelumenus másimu kada aula akumula estudante 45,” nia hakotu.
Notísia relevante:Estudante timoroan 534 hetan bolsa estudu eskola iha Indonézia durante tinan 2024
Jornalista: Osória Marques
Editór: Rafael Ximenes de A. Belo
