DILI, 13 dezembru 2024 (TATOLI)—Ministra Edukasaun, Dulce de Jesus Soares, hamutuk ho nia ekipa, sesta ne’e, hala’o enkontru ho Primeiru-Ministru (PM), Kay Rala Xanana Gusmão, hodi relata rezultadu ezame nasionál tinan 2024 molok anúnsia ofisiál rezultadu ba públiku.
“Kona-ba rezultadu ezame nasionál Ministériu Edukasaun (ME) ofisialmente anúnsia ba públiku iha loron ohin sesta, maibé molok fó sai rezultadu, ami mai hasoru malu ho Primeiru-Ministru hodi aprezenta rezultadu ezame nasionál tinan-2024 hodi bele hetan orientasaun,” Ministra Dulce Soares, hato’o iha Palásiu Governu.
Notísia relevante : ME sei anúnsia rezultadu ezame nasionál iha loron 13 dezembru
Governante ne’e sente haksolok tebes tanba hafoin aprezenta rezultadu, sira hetan apresiasaun di’ak husi Xefe Governu no husu atu servisu maka’as hodi hadi’a parte sira ne’ebé persiza hadi’a, ezemplu tenke halo analiza ba dadus valór husi estudante sira hodi haree iha tinan sira tuir mai bele fó formasaun saida ba profesor sira no jestaun eskolár saida mak ME persiza hadi’a nune’e tinan ba tinan bele hadi’a prosesu aprezendizazen iha Timor-Leste.
“Ami haksolok tebes tanba bele hetan apresiasaun di’ak husi Primeiru-Ministru, ne’ebé ita haree katak prosesu aprendizajen iha mudansa ne’ebé signifikativu iha parte profesór nune’e mós estudante. Ida-ne’e fó esperansa ida ba Ministériu Edukasaun katak intervensaun oitoan ne’ebé ita halo fó duni impaktu ne’ebé mak di’ak,” nia akresenta.
Totál estudante finalista ne’ebé tuir ona ezame nasionál hamutuk 55.611, ne’ebé husi númeru ne’e Ensinu Báziku iha na’in-28.217, Ensinu Sekundáriu Jerál iha 23.6761, no Ensinu Sekundáriu Tékniku Vokasionál iha 3.733.
Jornalista : Arminda Fonseca
Editora : Julia Chatarina
