DILI, 2 janeiru 2025 (TATOLI)-Vise Xefe Estadu Maior Jenerál Falintil-Forsa Defeza Timor-Leste (F-FDTL), Majór Jenerál Calisto do Santos Coli Coliati, hatete servisu intelejénsia husi Komandu F-FDTL no PNTL buka tuir hela bala-musan ne’ebé halo kuak uma kakuluk, rezidénsia antigu Prezidente Repúblika, Francisco Guterres Lú-Olo, durante selebrasaun tinan foun, foin daudaun ne’e.
“Liuhusi Facebook mak ha’u haree ema ba tiru to’o eis-Prezidente Lú Olo nia uma ne’e krime. Polísia buka tuir i forsa armada nia intelejénsia mos buka”, nia dehan ba jornalista sira iha Komponente Naval, kinta ne’e.
Hatutan tan: “Ha’u husu tenke atensaun, tenke kuidadu, labele halimar katak Timor-Leste kilat ne’ebé ami kaer ne’e hodi halimar, la halimar ho sé de’it. Nasaun nia estabilidade, ba povu nia moris hakmatek, militár prontu atua, ne’ebé ha’u ko’alia la’ós foin ohin, ha’u desde uluk ko’alia kedas i agora ko’alia nafatin ba povu, ba Nasaun, presiza pás, estabilidade. Ita tama ba tinan foun ita tenke lori buat foun atu bele ajuda ita nia Estadu ita nia Nasaun hodi konstroi, hodi harii, hodi fó moris di’ak ba ita nia povu”.
Coliati husu ba ema hotu atu valoriza ita-nian lider sira-nian kontribuisaun ba Nasaun, mesmu buat balun la’o seidauk loos, la signifika buat hotu la-di’ak.
“Ha’u nia apelu mak kuidadu, tanba barak aproveita buat ida demokrasia, direitu umanus atu halo buat ne’ebé sira nia hakarak, maibé labele haluha ba estabilidade Nasaun atu garante pás no estabilidade iha aparellu rua ne’e polísia no forsa armada sira. Instituisaun rua ne’e papel mak garante seguransa, laiha individu no grupu ida ne’ebé mak hanoin aat ba lider sira, di’ak liu para”.
Hanesan komandu, nia dehan seidauk iha informasaun ofisiál, maibé liuhusi mídia sosiál no jornalista sira. “Ami seidauk iha informasaun, maibé kuandu kilat mosu iha rai-laran ne’e responsavel ida-idak nian. Agora militár back up fó apoiu”, dehan nia.
Rekorda fali katak iha selebrasaun tinan foun, kuarta (1/1/2025) iha tuku 1:00, uma kakuluk husi rezidénsia antigu Prezidente Repúblika, Francisco Guterres Lú Olo, iha área Farol hetan tiru. Bala-musan ne’ebé monu, parte PNTL no PSIK foti kedas ba nesesidade investigasaun.
Notísia relevante: PNTL kontinua buka tuir suspeitu ne’ebé tiru bala musan ba rezidénsia antigu Prezidente Lú Olo
Jornalista : Natalino Costa
Editora : Rita Almeida
