iklan

HEADLINE, KAPITÁL

AMD sosa ai-funan ho osan rihun $10 

AMD sosa ai-funan ho osan rihun $10 

Ai-funan pucuk merah ne’ebé empreza Robena kuda iha dalan protokolu Tasi-Tolu, Díli, kurta (10 setembru 2024). Imajen Tatoli/António Daciparu.

DILI, 13 Janeiru 2025 (TATOLI) – Autoridade Munisipál Dili (AMD) prevee rihun $10 hodi sosa ai-funan surat-tahan 200-resin, ai-funan ho tipu oioin 65 no vazu 165, informa Xefe Departamentu Servisu Água no Saneamentu, Domingos Soriano dos Santos.

Ai-funan sira ne’e sei kuda iha jardín Elemloi nian no iha Palásiu Prezidensiál to’o iha rotunda Comoro. AMD mós sosa rai-metan hamutuk saku 500 hodi bele kuda plantasaun sira ne’e.

“Ami sosa hotu ona ai-funan no rai-metan. Orsamentu aloka ba iha ne’ebá ne’e hamutuk rihun $10. Ai-funan sira ne’e empreza lokál ida nian iha Dili ne’ebé kuda halo viveiru”, responsavel ne’e reitera ba Tatoli, iha Matadouru, ohin.

Domingos dos Santos hateten daudaun seidauk bele kuda ai-funan sira hodi troka ida ne’ebé mate, tanba falta transporte hodi tula ai-funan ne’ebé sosa ona atu bá kuda.

Xefe Departamentu ne’e dehan AMD iha karreta haat ne’ebé utiliza ba serbisu dasa rai iha estrada ou fatin públiku sira no iha haat ne’ebé apoia hela ekipa konjunta Sekretaria Estadu Asuntu Toponímia no Organizasaun Urbana (SEATOU) hodi tula populasaun ba munisípiu sira.

“Ami ajuda hela SEATOU tula hela komunidade afetada husi dezastre naturál ba munisípiu, tanba ne’e mak seidauk kuda filafali. Karreta tula ai-funan atu kuda mak seidauk iha”, nia realsa.

Notísia relevante: AMD sosa ai-funan “Pucuk Merah” 200-resin kuda iha área Delta-Elemloi

Jornalista: Jesuína Xavier 
Editora: Maria Auxiliadora

iklan
iklan

Leave a Reply

iklan
error: Content is protected !!