iklan

EKONOMIA, HEADLINE

IGEADI mobiliza ona ekipamentu pezadu bá Zulo-il Lolotoe

IGEADI mobiliza ona ekipamentu pezadu bá Zulo-il Lolotoe

Prezidente IGEADI, Ana Paula da Cruz. Foto/Celestina Teles

DILI, 15 Janeiru 2025 (TATOLI) – Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) mobiliza ona mákina pezada sira hodi normaliza estrada ne’ebé danifika tanba kauza husi dezastre naturál ne’ebé akontese iha 30 Dezembru 2024 iha área Zulo-il, suku Lontas liga bá postu administrativu Lolotoe, munisípiu Bobonaro.

Prezidente IGEADI, Ana Paula, hateten nia parte haruka, horisehik, tékniku sira mobiliza karreta tronton husi Dili bá Cailaco-Bobonaro hodi tula mákiza pezada sira hodi lori bá Zulo-il, tanba estrada ne’e nia orijen kotuk dezde tinan kotuk.

“Ita halo tiha ona reabilitasaun no komunidade asesu ona, maibé monu fali entaun ita koordena ho Ministériu Obra Públika loke dalan alternativa kilómetru 2,3, maibe dalan ne’ebé ita loke ne’e foun. Entaun, tempu udan sempre monu, maibé brigada Maria Tapó iha ne’ebá hahú ohin sira sei bá hadi’a fali”, Ana Paula dehan ba Tatoli, iha Colmera, Dili, ohin.

Nia lembra katak dezde Dezembru 2024 pedidu emerjénsia ne’ebé tama ba IGEADI barak, tanba udan ne’ebé tau halo munisípiu lubun mak afetadu ba dezastre naturál mak hanesan iha Viqueque mota Welolo danifika infraestrutura bazíka no daudaun brigada Daitula kontinua hasai sedimentuasaun iha mota referidu. Aleinde ne’e, iha Uma Tolu-Lacluta, ponte Sumako liga bá Natarbora-Viqueque kotu no ekipa rezolve ona.

Iha Dili, udan tau iha tinan foun ne’e afeta maka’as iha parte Metinaro ne’ebé halo mota tun no estraga komunidade nia kintál, depois volume mota Casnafar maka’as no tama komunidade nia uma. Iha Hera, mota tun no tama kazerna komponente Navál, FALINTIL-Forsa Dezefa Timor-Leste (F-FDTL).

Ba situasaun ne’e, brigada Samba 9 ne’ebé toma konta iha Dili, Liquiçá no Aileu, daudaun ne’e kontinua serbisu hodi halo normalizasaun. Iha Metinaro  halo ona melloramentu ba bee-dalan, iha Casnafar ekipa kontinua hasai sedimentasaun no iha kazerna F-FDTL Hera ne’e ekipa kontinua hasai sedimentasaun no mota mós provizóriu tau ona jumbo bag atu sátan mota halai tuir nia dalan.

“Ami koordena ona ho Ministériu Obra Públika buka kompañia ruma ho emerjénsia halo serbisu rentensaun iha mota Hera nian ne’e atu tempu udan bee halai tuir nia dalan”, nia dehan.

Notisia relevante:  Estrada Zulo-il Loloto’e hetan estragus totál, presiza rezolve urjente

Jornalista: Arminda fonseca

Editora: Maria Auxiliadora

iklan
iklan

Leave a Reply

iklan
error: Content is protected !!