iklan

DESPORTU

Nilton Gusmão: “Ha’u promete sei fó tempu dezenvolve futeból TL”

Nilton Gusmão: “Ha’u promete sei fó tempu dezenvolve futeból TL”

Prezidente Eleitu FFTL, Nilton Telmo Gusmão dos Santos. Imajen Tatoli/Francisco Sony.

DILI, 15 janeiru 2025 (TATOLI)–Prezidente Federasaun Futeból Timor-Leste (FFTL), Nilton Telmo Gusmão dos Santos, hateten bainhira Assosiasaun Futeból Munisípiu no Profisionál sira fó konfiansa atu lidera FFTL prontu atu fó tempu hotu hodi dezenvolve futeból Timor-Leste (TL) atu sai di’ak ba oin.

Notísia Relevante: Nilton Gusmão eleitu ba Prezidente FFTL no promete hamoris liga rai-laran

“Assosiasaun Munisípiu no Profesionál sira fó konfiansa mai ha’u, tanba realidade atividade futeból sira-ne’ebé la’o hela iha ita nia rai-laran, nune’e sira depozita konfiansa mai ha’u atu sai hanesan alternativa ida hodi bele buka solusaun ruma iha períodu ikus tinan ida nian. Hanesan Prezidente eleitu, ha’u promete no onradu fó hotu ha’u-nia tempu ba futeból atu kontribui hadi’a ita-nia futeból iha nasaun ne’e,” Nia hateten ba Agência TATOLI liuhusi programa “Entrevista Eskluzivu” ho topiku “Planu no Prioridade Durante Mandatu” iha estúdiu Faról, kinta ne’e.

Nia sei fó tempu tomak ba dezenvolvimentu futeból la signifika lideransa sira ba kotuk la halo buat ida, maibé lideransa hotu halo no nia tempu sei konsentra atu dezenvolve uluk iha liga rai-laran hafoin hadi’a selesaun nasionál hodi reprezenta Timor-Leste.

“Organiza atividade rai-laran iha tinan hira ba kotuk, ita harii ona Liga Futeból Timor-Leste (LFTL) maibé ikus orgaun liga ne’e paradu tiha bainhira ha’u rezigna-aan. Maibé, hanesan ohin, ha’u nu’udar Prezidente FFTL hamutuk ho Assosiasaun sira hotu tenke reativa ita-nia liga futeból rai-laran, atu fó fali ánimu ba ita-nia sosiedade no fó fali biban ba ita-nia klube sira hotu hahú prátika fali futeból iha ita-nia nasaun. Se ita halo hanesan ne’e hakmaan ona serbisu FFTL nian, tanba preparasaun ba jogadór selesaun sira mai kedan ona husi klube sira. Ami hein selesiona jogadór sira tau hamutuk iha selesaun nasionál,” Nilton dehan.

Ho mandatu ne’ebé mínimu, nia dehan, nia parte sei la halo buat barak maibé ho esforsu hotu tenke realiza atividade balun no hadi’a dezenvolvimentu futeból hanesan kapasitasaun ba rekursu umanu no infrastrutura futeból ne’ebé daudaun ne’e ladún sufisiente.

“Buat balu ne’ebé ha’u tenke halo maibé extraordináriu labele. Ida baibain de’it, ida-ne’e ha’u hanoin ita la responde espetativa ne’ebé mai ita-nia sosiedade iha ba FFTL. Ida-ne’e mak ha’u tenke halo no konta nafatin ho ema hotu nia apoiu liuliu sosiedade hadomi futeból sira-nia kontribuisaun liuhusi hanoin, morál atu eleva liután ita-nia mehi ba jogadór selesaun nasionál sira bele hatudu rezultadu ne’ebé di’ak iha kompetisaun internasionál. Ita bele lakon ba, maibé lakon ho dignidade,” nia hateten.

Reativa liga

Nia hateten, iha ninia mandatu ida-ne’e, nia parte sei reativa liga futeból iha Timor-Leste hodi ánima sosiedade hadomi futeból iha Timor-Leste, tanba daudaun ne’e órgaun liga sira iha inisiativa halo ona komunikasaun ho nia.

“Ema hotu ansi loos hakarak liga ne’e tenke la’o lalais. Orgaun liga sira mós komunika ona ha’u, bainhira ha’u eleitu sira mós iha ne’ebá kedan. Prezidente, bainhira mak ita hasoru malu atu ko’alia kona-ba oinsá atu re-organiza fali liga ne’e. Ida-ne’e tama husi parte prinsipál ida husi ha’u-nia mandatu hosi programa sira seluk. Ami konfirma malu ona. Ne’ebé, kinta (16 janeiru 2025) aban, ami sei hasoru malu oinsá sira bele haree hodi prepara sira-nia kongresu hili Prezidente Liga Futeból Timor-Leste (LFTL) foun atu avansa ba atividade sira,” nia afirma.

Tuir nia, LFTL daudaun ne’e iha situasaun ida-ne’ebé komplikadu tanba laiha Prezidente maibé ba oin iha ona Prezidente LFTL bele organiza ona planu prioridade sira, oinsá mak realiza liga nune’e hetan apoiu ruma husi FFTL no Governu.

“Ha’u fiar Governu sei apoiu atividade liga nian atu fó biban ba ita-nia kamada juventude sira-ne’ebé mak hadomi futeból bele fila-fali ho sira-nia talentu,” nia dehan.

Tuir planu ne’ebé FFTL trasa ona, liga futeból tenke realiza antes fulan-juñu 2025 bainhira jogu Komunidade Nasaun Ko’alia Lian Portugés (CPLP-sigla portugés) termina ona.

“Liga, ita planu ona, sei realiza bainhira jogu CPLP termina. Ita hatene katak agora mós tempu udan hela. Maibé, ita sei haree hela, se ita halo antes bele halo antes, se la biban ita tenke halo iha fulan-juñu,” nia hateten.

FFTL iha fundu natoon atu apoiu Liga Futeból Timor-Leste (LFTL) hala’o atividade iha tinan ida-ne’e, no fiar katak Governu apoiu tan liga sei la’o di’ak iha Timor-Leste.

“Ha’u deklara iha fatin ida-ne’e katak, ami FFTL iha fundu atu apoiu ba liga. Maibé, klaru ita mós presiza tulun husi Governu nian tanba ami mesak sei labele hala’o atividade ne’e, tanba FFTL iha mós ajenda oioin hanesan formasaun ba treinadór sira, arbitrajen sira no konsentra barak liu iha jogu internasionál sira. Ida-ne’e mak osan sira-ne’e hotu, balun mak ita halo ezersisiu hodi aloka ba ita-nia liga. Maibé, husi Governu ha’u fiar katak Governu sei fó apoiu másimu,” nia dehan.

Nune’e, nia hateten, iha tempu besik estrutura FFTL sei buka tempu hasoru malu ho Ministériu Juventude Desportu Arte no Kultura (MJDAK) atu ko’alia kona-ba oinsá mak Governu nia apoiu ba orgaun liga atu realiza atividade

Aleinde ne’e, nia husu mós ba Liga Futeból Timor-Leste tenke iha meiu rasik atu buka patrosinadór hodi apoiu ba atividade liga nian, nune’e jogu hotu bele la’o ho másimu.

Fó apoiu ba Assosiasaun Munisípiu sira

Aleinde ne’e, tuir nia, programa seluk mak atu fó apoiu ba Assosiasaun Munisípiu sira atu bele realiza atividade futeból iha nivel munisipál

“Ita mós haree hela atu fó apoiu ba Assosiasaun Munisípiu sira hodi bele realiza sira-nia atividade futeból iha munisípiu. Ida-ne’e, ajenda ida importante tebes husi ami-nia programa atu halo iha tinan ida-ne’e nia laran,” nia hateten.

Hanesan lideransa ba FFTL, nia hakarak futeból labele konsentra de’it iha Dili laran maibé tenke loke liras sai husi kapitál Dili ba munisípiu sira, nune’e bele buka fini jogadór ba selesaun nasionál.

“Futeból ita labele konsentra de’it iha Dili laran, tenke lori to’o munisípiu sira hotu. Ita lahatene, iha munisípiu sira-ne’e jogadór di’ak barak. Se di’ak barak, ita tenke promove sira,” nia dehan.

Jornalista : Hortencio Sanchez

Editór       : Cancio Ximenes

iklan
iklan

Leave a Reply

iklan
error: Content is protected !!