iklan

HEADLINE, OEKUSI

Autoridade RAEOA abertura ona formasaun iha SFPB

Autoridade RAEOA abertura ona formasaun iha SFPB

Autoridade RAEOA liuhusi Sekretária Rejionál ba Edukasaun no Asuntu Sosiál (SREAS), Inácia Tamele, abertura ona formasaun profIsionál tinan 2025 nian ba formandu na’in-145 hodi kapasitaan iha Sentru Formasaun PrefIsionál Bansone, ne’ebé lokaliza iha suku Cunha, Postu Administrativu Pante Makassar. Imajen/Espesiál

OÉ-CUSSE, 20 Janeiru 2025 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhusi Sekretária Rejionál ba Edukasaun no Asuntu Sosiál (SREAS), Inácia Tamele, abertura ona Sentru Formasaun Profisionál Bansone (SFPB), ne’ebé lokaliza iha suku Cunha, Postu Administrativu Pante Makassar.

Hafoin abertura formadu na’in-145 mak tuir kedan formasaun ba programa agrikultura, ospitalidade no konstrusaun jerál hanesan, karpintária, pedreiru, alfenária, soldadura no kanalizasaun.

“Objetivu imi mai iha fatin ida-ne’e atu bele mai aprende, SEFOPE nakloke ba ema hotu, sira-ne’ebé kbi’it la sufisiente atu kontinua estudu iha universidade, fatin mak ne’e bele mai aprende iha ne’e. Imi aprende ho di’ak, sei uza imi nia matenek no koñesimentu atu kria rasik kampu traballu ba imi nia aan rasik,” hateten , Inácia Tamele, iha ámbitu abertura, ohin.

Notísia relevante:SEFOPE fasilita joven 65 tuir formasaun iha Sentru Formasaun Bansone

Imajen/Espesiál

Nia husu ba formandu 145 kompostu husi  mane 59 no feto 86 atu hatudu pontualidade no dixipliña durante partisipa formasaun.

“Ema atu hatene ita nia kualidade formasaun haree ita nia karatér ka asaun servisu iha terenu, ida mak pontualidade no dixipliña, tan ne’e ha’u apela ba formadu foun sira ne’ebé mai tuir formasaun, atu aprende didi’ak, sentru formasaun ida ne’e atubele transforma no muda ema sai kreativu no sai matenek. Ha’u husu ita bo’ot sira atu kumpre regra no tenke aprende ho fuan,” nia fó hanoin.

Iha fatin hanesan, Diretór SEFOPE Oé-Cusse, Mario Muni Salu, dehan SEFOPE nia planu atu harii sentru formasaun ida ne’e, atu kapasita joven sira iha área espesialidade oioin nune’e bele prepara aan hodi responde merkadu traballu iha futuru.

“Ita loke sentru formasaun atu bele hasa’e kapasidade joven sira nian ka forma joven sira ne’ebé mak iha kualidade di’ak, entaun ita bele redus ona dezempregu bainhira juventude barak mak kria rasik sira nia servisu tuir matenek ne’ebé sira hetan husi formasaun ne’e,” nia dehan.

Nune’e, husu mós ba formandu sira atu aprende ho didi’ak tanba atu sai ema ne’ebé mak iha kualidade presiza ema ne’ebé badinas estuda no kreativu hodi halo servisu.

Entretantu, Prezidente Konsellu Sentru Formasaun Profisional Bansone, Domingos Obe, husu ba formandu sira atu kumpre regra sira durante tempu formasaun, tanba iha sentru formasaun Bansone iha regulamentu ne’ebé rigor.

“Karik jovén balun, envolve aan iha grupu arte marsiais atu labele mete bei-beik presiza redús ona, tanba Sentru Formasaun ne’e sei iha servisu barak ne’ebé formandu sira tenke aprende barak no foku liu ba formasaun duke kalan-kalan ba mete fali arte marsial ida ne’ebé la fó benefisiu ba imi nia futuru,” nia apela.

Notísia relevante:INDMO atribui sertifikadu akreditasaun ba sentru formasaun profisionál

Jornalista: Abílio Elo Nini

Editór: Florencio Miranda Ximenes

iklan
iklan

Leave a Reply

iklan
error: Content is protected !!