DILI, 20 Janeiru 2025 (TATOLI) – Ministériu Edukasaun (ME), liuhusi servisu edukasaun munisípiu Dili, fasilita ona karta transferénsia ba estudante na’in-tolu ne’ebé sai vítima ba despezu administrative ne’ebé hala’o husi Sekretaria Estadu asuntu Toponomia no Organizasaun Urbana (SEATOU).
Xefe Departamentu Ensinu Edukasaun Munisípiu Dili, António Pereira Ximenes, hateten fasilita ona karta transferénsia ba estudante na’in-tolu (3) hodi kontinua sira-nia prosesu aprendizajen iha eskola seluk.
“Kona-ba eviksaun ne’e, iha estudante na’in-tolu mak nia inan-aman mai husu karta transferénsia no rekomendasaun hodi ba kontinua iha eskola seluk, nune’e ita fasilita ona sira-nia tolu ne’e, no ita nafatin hein vítima sira seluk, karik sira mai husu ita nafatin fasilita”, Ximenes, dehan liuhusi telemovel, segunda ne’e.
Ximenes haktuir, estudante na’in-tolu antes ne’e eskola iha ensinu báziku Fomentu II maibé tanba sira-nia uma hetan despezu, nune’e sira muda fali ba Comoro no kontinua mós eskola iha Ensinu Báziku 5 de Maio Comoro.
“Estudante na’in-tolu ne’ebé muda ba eskola 5 de Maio ne’e tanba sira hetan eviksaun, entaun sira-nia família muda ba área Comoro ne’ebé sira mós muda eskola ba ne’ebá hotu”, nia afirma.
Nia afirma, Ministériu Edukasaun nafatin disponivel atu fasilita karta rekomendasaun no transferénsia ba estudante sira ne’ebé vítima ba despezu administrative.
Jornalista: Osória Marques
Editór : Zezito Silva
