COVALIMA, 20 janeiru 2025 (TATOLI) – Ministériu Solidariedade Sosiál no Inkluzaun (MSSI), liuhusi Sentru Solidariedade Sosiál no Inkluzasaun (CSSI), Covalima seidauk fó sai rezultadu prosesu rekrutamentu ba funsionáriu sira ne´ebé sei destaka ba iha postu administrativu hitu iha munisípiu Covalima.
Diretór CSSI, Agapito Assis relata katak , MSSI loke vaga ba públiku iha tinan-2024 kona-ba área tékniku apoiu Sosiál atu destaka ba postu administrativu Fatululik, Fatumea, Fohorem,Tilomar, Maucatar, Suai no Zumalai.
“Bazeia ba dadus aplikante (konkorrente) ne’ebé submete dokumentu iha tinan kotuk hamutuk 50 maibé atu fó sai rezultadu ida-ne’e sei iha prosesu tanba ami haruka de’it dokumentu aplikasaun ba diresaun rekursu umanu nasionál MSSI,” Agapito Assis informa iha Suai Loro, ohin.
Bazeia totál ba vaga ne’ebé fó sai hamutuk 14, husi númeru kada postu administrativu Ministériu Solidariedade Sosiál presiza atu koloka tékniku sosiál na’in rua nune’e apoia serbisu iha postu administrativu sira.
Prosesu atu fó sai rezultadu selesaun dokumentu ida-ne’e seidauk hatene, depende desizaun husi rekursu umanu nasionál MSSI tanba hafoin fó sai rezultadu kontinua halo entrevista ho aplikasaun sira ne’ebé pasa iha selesaun dokumentu.
Bazeia ba dadus ne’ebé sentru Solidariedade sosiál no Inkluzasaun rejista konkorrente ne’ebé submete dokumentu ba vaga Tékniku asisténsia sosiál husi postu hitu hamutuk 50. Husi númeru ne’e, mane na’in 25 no feto 25.
Konkorrente husi Postu administrativu Fatululik ne’ebé konkorre ba vaga ne’e hamutuk na’in-hitu, Fatumea na’in-lima, Fohorem na’in-rua, Zumalai na’in-lima, Suai nain-sia, Maucatar 12 no Tilomar na’in-10.
Konkorrente Angelina do Carmo, reforsa katak, hanesan konkorrente vaga Tékniku sosiál destaka ba postu hein de’it informasaun husi MSSI ne’ebé atu fó sai rezultadu selesaun dokumentu.
“Ami aplikante ba vaga ne’e hein de’it informasaun bainhira pasa iha selesaun dokumentu bainhira MSSI fó taka sai rezultadu mak naran iha ami kontinua tuir prosesu ba faze entrevista hafoin hein fali rezultadu ikus,” nia reforsa.
Jornalista: Celestina Teles
Editór :Rafael Ximenes d A. Belo
