SUIÇA, 20 janeiru 2025 (TATOLI) –Hafoin viajen intensa, Xefe Estadu Timor-Leste, José Ramos Horta, to´o ona iha aeroportu internasionál Zurich, Suiça hodi partisipa Fórum Ekonómiku Mundiál ne’ebe sei realiza iha sidade Davos.
Ba aeroportu, Xefe Estadu akompaña hosi Vise-primeiru-ministru, ministru asuntu sosiál no ministru dezenvolvimentu rurál no abitasaun komunitária, Mariano Assanami Sabino no seluktan. Tuirmai, Prezidente Ramos Horta, hahú viajen husi Dili ba Singapura ho aviaun Aero Dili, ho voo númeru 8G991, ho tipu aviaun A320.
Viajen husi Aeroportu Internasionál Nicolau Lobato, hahú tuku 17h00 otl no to´o iha aeroportu internasionál Changi Singapura tuku 20.00 oras lokál/Singapura, maizmenus oras tolu resin. Iha Singapura, Prezidente Repúblika simu hosi diplomata timoroan iha Singapura, Alexandre da Cruz Araújo Tilman.
Tuirmai, iha segunda (20 janeiru 2025), Prezidente Repúblika José Ramos Horta kontinua viajen husi Singapura ba Suiça ho aviaun Singapore Airlines ho voo númeru SQ-2929 no to´o iha Suiça simu kedas husi pesoál embaixada Geneva iha aeroportu internasionál Zurich, Suiça. Prezidente Repúblika, tuir estimasaun, voo oras sanulu-resin tolu liu minutu lima, husi Singapura to´o fatin destinasaun ne´e.
Tuir ajenda ne´ebé TATOLI asesu, entre ajenda sira seluk, ajenda prinsipál Prezidente repúblika durante iha Suiça, iha ámbitu vizita serbisu nian maka foka ba enkontru nível altu maka ninia partisipasaun iha sesaun “ASEAN nia Viajen ba Unidade: Lisaun sira iha Diplomasia no Kolaborasaun Rejionál,” ne’ebé foka ba oinsá ASEAN nia abordajen úniku ba diplomasia no kooperasaun multilaterál.
Prezidente sei kontribui mós ninia hanoin sira iha sesaun “Navegasaun iha Ázia nia Hotspot sira”, hodi aborda dinámika seguransa rejionál no implikasaun ekonómika sira iha rejiaun Ázia-Pasífiku. Sesaun públiku ida-ne’e sei transmite direta, ho diskusaun sira kona-ba evita eskalasaun iha mudansa balansu podér no kompleksidade territoriál sira.
Nu’udar Laureadu Prémiu Nobel ba Pás, Prezidente José Ramos Horta sei fahe nia esperiénsia iha jantar espesiál ida ho maluk Laureadu Nobel sira, inklui Profesór Ardem Patapoutian no Muhammad Yunus, ho prezensa husi Suas Majestade Liurai Philippe no Liurai-feto Mathilde hosi Béljika, no Liurai Letsie III husi Lesoto.
Nune´e mós sei partisipa iha almosu Enkontru Informál Líder Ekonómiku Mundiál sira (IGWEL), ne’ebé foka liu ba prevene kooperasaun non globál hodi sai hanesan status quo foun.
Xefe Estadu, durante iha Davos, tuir planu, sei hala’o enkontru bilaterál ho figura prinsipál internasionál sira, inklui Sekretáriu-Jerál ASEAN nian, Kao Kim Hourn, hodi aborda Timor-Leste nia dalan ba adezaun tomak ba ASEAN.
Prezidente Repúblika José Ramos Horta nia partisipasaun iha Fórum Ekonómiku Mundiál subliña kompromisu Timor-Leste nian ba diálogu internasionál no kooperasaun hodi hatán ba dezafiu globál sira no avansa integrasaun rejionál.
Entretantu, Prezidente Repúblika hafoin vizita serbisu nian iha Davos, Suiça, tuir ajenda, sei fila hikas ba Timor-Leste, iha kinta (23 janeiru 2025).
Jornalista: Jogerjo Guterres
Editór: Rafael Ximenes de A. Belo
