DILI, 21 janeiru 2025 (TATOLI)—Universidade Nacionál Timor Lorosa’e (UNTL) hamutuk ho Embaixada Korea Súl iha Timor-Leste halo abertura ba inisiativa ida hanaran King Sejong Institute (KSI) Dili ho objetivu atu promove lian ka dalen Korea no kultura Korea nian ba estudante sira iha UNTL.
Totál estudante sira-ne’ebe rejistu ba King Sejong Institutu ne’e hamutuk na’in-45 mak agora daudaun tuir formasaun língua Koreana iha UNTL no dosente Koreana mak hanorin sira.
Reitór Universidade Nacionál Timor Lorosa’e (UNTL), João Soares Martins, iha ninia interversaun bainhira hala’o abertura ba atividade ne’e hateten, inisiativa ne’e importante tebes atu promove oportunidade aprendijazen.
“Ida-ne’e inisitiva ida importante tebes hodi kontinua promove oportunidade aprendijazen no-mós ida-ne’e tulun ita promove kultura internasionál inklui kultura Koreana. Ha’u hein katak estudante sira aproveita oportunidade ida-ne’e ho ótimu,” Reitór ne’e hateten iha UNTL, ohin.
Deputy Chief of Mission Korea iha Timor-Leste, Park Sungheui, hateten King Sejong Institute (KSI) ida-ne’e bele oferese oportunidade hodi kumprende Korea no loke dalan ba interkambiu kulturál entre povu Timor-Leste no povu Korea.
Nia dehan, King Sejong Institute (KSI) iha Dili sustentável, importante tebes asegura partisipasaun ativu husi estudante sira no mós atinje nivel akadémiku aas.
“Husu atu estudante sira labele falta formasaun ne’e, haree estuda makaas no atinje rezultadu di’ak. Espera katak estudante sira hotu ne’ebé hetan oportunidade tuir formasaun língua ne’e bele sai hanesan ezemplu susesu no sai ponte ba halo ligasaun entre povu ba povu. Entaun King Sejong Institute (KSI) sei serbí nu’udár plataforma edukativa hodi sistemátikamente promove edukasaun língua Korea no promove mós kultura Korea,” nia tenik.
Tanba ne’e, nia hato’o agradesementu ba MoU ne’ebé Reitor UNTL no Embaixada Korea asina iha tinan 2023, hodi kontinua oportunidade sira entre povu Timor-Leste ho komunidade internasional Center for Korean Studies (CKS) hodi promove Korean Studies.
“Agora, UNTL ho Center for Korean Studies (CKS) komesa faze foun tan ho KSI hafoin servisu importante hamutuk ho Korea hanesan estudante interkambiu (2018), Ezame TOPIK (2019), Korea Corner (2020), Seed Program for Korean Studies (2021) dezde CKS hahú ofisialmente iha loron 11 jullu 2013,” nia dehan.
Partisipa iha lansamentu ne’e, Diretór Sentru Koreanu José Viegas, formadór, dosente husi KSI, Kim Na Yai, reprezentante Fakuldade Turizmu, funsionáriu, konvidadu inklui estudante sira.
Notísia Relevante: Hametin kooperasaun, Embaixada Korea ho UNTL asina MoU
Jornalista : Hortencio Sanchez
Editór : Cancio Ximenes