DILI, 21 janeiru 2025 (TATOLI)-Ministériu Edukasaun (ME) liuhusi Diretór Dirasaun Nasionál Rekursu Umanu, João Amaral, hatete bainhira ministériu deside loron teste ba profesór kontratu 2023 kuandu maknorin sira ne’e simu ona opsaun exame hodi konkore.
“Ita fó opsaun teste espesiál ba ita-nia antigu profesór Timoroan 2023 ne’e la’ós ita mak deside tan, maibé hein sira fó rezultadu dehan prontu ou konkorda ba opsaun ne’ebé Ministériu Edukasaun fó mak depois ita deside loron, fulan”, João Amaral hatete iha nia knaar fatin Vilaverde, tersa ne’e.
Nia dehan momentu halo diálogu ne’e sira la konkorda opsaun referida, nune’e mós ME mantein desizaun entaun antigu profesór kontratadu deside ko’alia ho antigu profesór sira hotu hafoin informa.
Notísia relevante: Ministériu Edukasaun fó opsaun teste espesiál ba antigu profesór kontratadu 2023
“Tanba ne’e ha’u atu dehan ba ita, katak ami hein de’it ita-nia antigu profesór kontratadu sira, ita labele deside sein resposta husi sira”, nia katak.
Diretór Ezekutivu Timor-Leste Coalition for Education (TLCE), José Monteiro, husu ba ME fó opsaun tenke ho enkuadramentu legál hodi garante sustentabilidade iha kualker períodu governasaun.
“TLCE apresia inisiativa Ministériu Edukasaun nia no mós antigu profesór kontratadu sira ne’ebé nafatin buka dalan di’ak liu hodi solusiona, foti solusaun karik permanente, la’ós solusaun ne’ebé agora fó Governu seluk mai muda fali”, katak nia.
TLCE nafatin enkoraja ba parte rua hotu atu kontinua iha diálogu.
Notísia relevante: Profesór kontratadu 2023 hamutuk 1.499 la tama ingresu espesiál
Jornalista : Osória Marques
Editór : Zezito da Silva