DILI, 22 janeiru 2025 (TATOLI)-Pro-Reitór ba Asuntu Dezenvolvimentu Institusionál iha Universidade Nasionál Timor Lorosa’e (UNTL), Lelis Gonzaga Fraga, hatete reabilitasaun auditóriu fakuldade ekonómia atinje ona pursentu 65.
“Hein kompleta no entrega hodi uza ba atividade fakuldade nian”, Lelis dehan iha nia kna’ar fatin UNTL, kuarta ne’e.
Nia dehan, obra ne’e UNTL aloka rihun $80 ba reabilitasaun saladeaula tolu iha fakuldade ekonómia no jestaun. “Kona-ba moderniza auditóriu fakuldade ekónomia no jestaun no halo manutensaun ba saladeaula tolu nian ne’e, kompañia Neltifer mak sai manán na’in ba renovasaun, nune’e ita fó ona servisu ba sira, agora daudauk sira hahú servisu tuir kontratu”.
Modernizasaun saladeaula iha fakuldade ekonómia no jestaun nia durasaun konstrusaun fulan tolu, hahú setembru no tinan ikus iha 2024. Maibé agora estende tan fulan tolu hahú janeiru to’o marsu.
“Saladeaula rua ne’e futuru utiliza ba kursu maestradu, modellu sai hanesan auditóriu ida ne’ebé kompleta ho projetór no ba online”, nia dehan.
Project Manajer iha UNTL, Fernao Soares Reis, hatete projetu ida-ne’e mós tuir loloos finaliza tinan kotuk, maibé tanba iha mudansa dezeñu entaun haruka kompañia halo fali nune’e han tempu uitoan.
Diretór Kompaña Neltifer, Nelson Fatima Doutel Fereira, informa projetu bazeia ba kontratu husi UNTL atu halo modernizasaun ba auditóriu no halo reabilitasaun ba saladeaula tolu.
“Projetu ida-ne’e ami hetan husi UNTL hanesan na’in ba projetu atu halo modernizasaun, aleinde ne’e mós iha reabilitasaun ba sala-de-aula tolu tuir dezeñu UNTL nian, ne’ebé nia durasaun fó mai ami ne’e fulan tolu hahú iha setembru no sei termina iha dezembru 2024”, nia dehan.
Aleinde ne’e, projetu kiik ne’ebé nahe pavimentu iha aredór fakuldade ekonómia nian tanba bainhira udan, udan-been tama de’it.
“Tanba ida-ne’e kompañia Kotawake Unipesoal LDA mak kaer, durasaun fulan haat, orsamentu iha rihun $64 , ne’ebé ida-ne’e nia atinje ona 95%”, nia dehan.
Notísia relevante: Empreza hahú halo manutensaun saladeaula tolu iha fakuldade Ekonomia no Jestaun UNTL
Jornalista : Osória Marques
Editór : Zezito da Silva
