BOBONARO, 24 janeiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, orienta xefe suku 50 iha Bobonaro atu realiza enkontru nivél suku no aldeia ho povu kada fulan, nune’e bele rona povu nia preokupasaun no problema sira-ne’ebé akontese iha baze.
Notísia Relevante: PM Xanana sei vizita munisípiu sira antes realiza eleisaun ba Governu lokál
Nia hateten, liuhusi Inkontru ne’e mak komunidade liuliu joven sira bele fó opinaun konstrutivu ba dezenvolvimentu ekonomía iha Munisípiu Bobonaro hodi prepara-aan hasoru implementasaun politika desentralizasaun administrativa no poder lokál iha futuru.
“Ha’u husu ba liurai sira Kada fulan tenke enkontru ho inan-aman, joven, lia-na’in, líder joventude, grupu feto sira hotu iha aldeia, hodi rona sira-nia preokupasaun, Hakbesik-aan ba sira tanba saida ha’u hakarak ida-ne’e. Se ita la kria kondisaun aban bainrua ema ida mai atu lori Prezidente Kámara Munisípiu ne’e, atu lori saida mak sustenta mal. Entaun, tenke halo enkontru, mume’e ita diskute kona-na ita atu ba ne’ebé, fó hanoin ba joven sira para halo servisu makaas,” Nia hateten iha salaun enkontru Administrasaun postu Maliana, sesta ne’e
Kada semana rua, nia dehan, sei realiza enkontru ho administradór postu neen (6) iha Bobonaro hodi rona no diskute kona-bá preokupasaun ne’ebé povu enfrenta, maibé di’ak-liu ne’e hahú mós iha nivél baze tanba xefe suku no xefe aldeia mak besik liu povu no hatene di’ak saida mak povu sente no presiza.
Nia reforsa, iha marsu ne’e Primeiru-Ministru, Kayrala Xanana Gusmao, sei halo vizita mai munisípiu Bobonaro hodi rona no haree direta problema ne’ebé akontese iha suku no aldeia sira iha Bobonaro.
Xefe sukuu Raifun, postu admibnistrativu Maliana, munisípiu Bobonaro, Domingos Salvador, hateten nu’udar líder komunitária nia parte prontu atu kumpre orientasaun ne’e tanba kada trimester ne’e nia sempre halo enkontru ho ninia povu.
“Durante ne’e, ami sempre halo enkontru kada trimestre. Kuandu iha atividade suku nian, ha’u envolve komunidade liuliu intelektuál sira tanba intelektuál sira mak sai konselleru ba ha’u. Orientasaun tun ona ne’e, ami sei hala’o kada fulan no ita koko beibeik, nune’e sira bele partisipa másimu,” nia hateten.
Suku ne’e pretense ba munisípiu Bobonaro hamutuk 50, aldeia 193, postu administrativu neen (6) ho nia totál populasaun hamutuk 106,543 ho xefe fámilia hamutuk 20,802.
Notísia Relevante: PAM Bobonaro “Ha’u-nia mandatu hakarak valoriza no promove kultura”
Jornalista : Sergio da Cruz
Editór : Cancio Ximenes
