DILI, 31 janeiru 2025 (TATOLI)–Árbitru timoroan na’in-rua (2) susesu iha sira-nia kareira hodi foti lisensa ba nivél A husi Asian Footall Federation (AFF) foin lalais ne’e iha Tailándia.
Notísia Relevante: AAFTL prepara árbitru lisensa B na’in-36 ba Liga Futeból Timor-Leste
Prezidente Asosiasaun Árbitrajen Futeból Timor-Leste (AAFTL), Nivio da Costa Fernandes, hateten árbitru na’in-rua (2) ne’e hetan ona lisensa husi AFF no ida-ne’e orgullu ba Timor-Leste.
Timoroan na’in-rua (2) ne’ebé hetan ona sertifikadu ho lisensa A hanesan, Francisco Pereira international referee FIFA 2025 Certificate AFF category A., Emercio Levio international futsal referee FIFA 2025, certificate AFF category A.
“Sira na’in-rua hetan ona lisensa mai husi AFF, sira-ne’e development refree officer mak haruka sira-nia kartaun lisensa no ekipamentu balun mai atu rekoñese de’it katak árbitru na’in-rua ne’e hetan ona lisensa,” Nivio hateten ba Agência TATOLI iha edifisiu Federasaun Futeból Timor-Leste (FFTL), Bairro dos Grilhos, sesta ne’e.
Ba future, nia dehan, árbitru na’in-rua (2) ne’e atu funsiona sei hein xamada husi development refree officer atu nomeia sira bainhira kompetisaun ruma iha AFF sira foin bele dezloka ba partisipa iha kompetisaun sira-ne’ebé AFF organiza iha nasaun ne’ebé de’it.
Nia esplika, árbitru na’in-rua (2) ne’e Francisco Pereira nu’udar árbitru futeból kampo boot tun iha pozisaun klaran no Emercio Levio hanesan árbitru ba futsál nian, sira-nia lisensa ne’e foin mak to’o iha Timor-Leste iha semana kotuk.
“Iha kategoria tolu ba árbitru sira hanesan primeiru mak árbitru FIFA ne’e ba árbitru ne’ebé nia nivel boot tebes. Segundu, mak árbitru nivel Asian Football Confederation (AFC) ho nia prosesu ketak. Ita agora ba kategoria AFC nian, ita iha ona árbitru ida mak iha hela prosesu nia laran. Agora, nia tuir hela formasaun atu hetan lisensa ba AFC nian ba akademika AFC. Iha prosesu hotu, nia liu mak sei dezloka ba Malázia atu tuir tan formasaun ba árbitru elite refree ba AFC. Ida agora tuir hela formasaun ba AFC mak Bernardino Mascarinhas, árbitru husi munisípiu Viqueque. Maibé sira na’in-rua (2) hetan ona lisensa A ne’e husi kategoria AFF nian,” nia esplika.
Iha sorin seluk, árbitru Francisco Pereira hateten, nia parte sente orgullu bele hetan ona lisensa A husi AFF ba árbitru nian.
“Ha’u sente kontente bele hetan lisensa A, ida-ne’e la’ós fasil maibé liuhusi prosesu ida naruk mak ohin loron ha’u bele to’o iha ne’e,” Francisco hateten.
Nia hatutan, lisensa ne’ebé nia hetan motiva nafatin nia atu hatudu prestasaun ne’ebé di’ak bainhira lidera jogu ruma iha nivel nasionál no internasionál.
“Ida-ne’e hanesan responsabilidade ida mai ha’u. Ha’u sei implementa buat hotu ne’ebé ha’u hetan bainhira lidera jogu sira iha kampu laran. Atu to’o iha ne’e, ami liu prosesu naruk liuhusi teste lubuk ida. Maibé, ho Maromak nia tulun, ohin, ha’u konsege hetan sertifikadu husi AFF ho lisensa A,” nia dehan.
Jornalista : Hortencio Sanchez
Editór : Cancio Ximenes
