Funsionáriu MNEK 100-resin sai benefisiáriu ba formasaun diplomata iha diáspora
DILI, 31 janeiru 2025 (TATOLI)—Sekretáriu Jerál Ministériu Negósiu Estranjeiru no Kooperasaun (MNEK), João Freitas de Câmara, hateten funsionáriu iha MNEK ema 100-resin mak durante ne’e sai ona benefisiáriu ba formasaun diplomata iha diáspora.
Notísia Relevante: MNEK realiza formasaun ba diplomata iha área diplomasia no ekonomia azúl
“Ita iha akordu kooperasaun ho nasaun barak hanesan Malázia, Nova Zelandia, Singapura, Filipina no Portugál no seluk tan, sira iha programa ne’ebé klaru ona atu fó formasaun ba ita-nia diplomata sira. Kada tinan, sira rasik haruka karta mai ita mak mobiliza diplomata sira ba tuir formasaun iha kada nasaun ne’ebé presiza,” João Freitas de Câmara hateten ba Agência TATOLI iha edifisiu MNEK, Dili, sesta ne’e.
Nia dehan, durante diplomata timoroan sira ba tuir formasaun iha rai-li’ur barak liu Ministériu responsabiliza billete aviaun no kada nasaun ne’ebé diplomata sira ba tuir formasaun, no ótel ho hahan ne’e kada nasaun mak sei responsabiliza.
“Formasaun ne’ebé ita-nia diplomata sira durante tuir ne’e iha área oioin mak hanesan protokolu, diplomasia, espesifiku ba lingua hanesan inglés no portugés,” nia dehan.
Nia hatutan, daudaun ne’e diplomata ne’ebé durante ne’e sai benefisiáriu ba formasaun iha diáspora hamutuk na’in-110 mak kolokadu iha Embaixada sira iha nasaun li’ur.
“Agora ne’e, ita-nia diplomata ne’ebé kolokadu iha Embaixada sira iha li’ur hamutuk 110, sira ne’e agora daudaun halo hela kobertura iha rai-li’ur, sira-nia servisu hanesan primeiru sekretáriu, segundu sekretariu no konselleiru. Adidu lae, ne’e koloka husi Ministeriu seluk. Embaixadór sira iha nomeasaun polítika,” nia hateten.
Formasaun ba diplomata sira iha nia kontinuidade, bainhira kada nasaun ne’ebé durante ne’e fó formasaun ba diplomata sira, MNEK nafatin haruka diplomata sira ba tuir nafatin formasaun.
Notísia Relevante: Malázia oferese millaun $3 hodi fasilita formasaun diplomata ba timoroan
Jornalista : Hortencio Sanchez
Editór : Cancio Ximenes
