OEKUSI, 05 Fevereiru 2025 (TATOLI) –Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA) liuhusi seksaun tránzitu halo apreensaun ba tum-tum hamutuk 32 tanba dokumentu dokumentu inspensaun liu prazu ona.
“Ita halo apreensaun ba tum-tum hamutuk 32 tanba ita halo pasa revista tum-tum balun dokumentu sirkulasaun liu prazu no laiha xapa martíkula. Ho apreensaun ne’e infratór sira konsege selu koima hamutuk $1.448,00,” Komandante PNTL RAEOA, Superintendente Polísia, Nicolau Francelino da Costa, ba jornalista sira iha Oekusi, ohin.
Notísia relevante:PNTL Oé-Cusse kontribui reseita rihun $53-resin ba kofre Estadu
Reseita $1.448 ne’e rekolla husi infratór sira ne’ebé viola kódigu estrada hanesan halo sirkulasaun la ho dokumentu viatura, karta inspesaun liu prazu, kontra ordén autoridade tránzitu, la monta xapa matríkula, karta kondusaun liu prazu, tula pasajeiru liu lotasaun no lisensa trajetu liu prazu.
Tanba ne’e, nu’udar komandante RAEOA fó hanoin ba sidadaun hotu iha Oekusi liuliu motorista sira presiza respeita regra tránzitu nian.
“Apela ba públiku iha Oekusi kontinua nafatin respeita regra tránzitu seguransa rodaviáriu, liuliu atu halo movimentu bá no mai iha Oekusi laran tenke lori dokumentu, nune’e labele prezudika sira-nia movimentu,” nia informa.
Notísia relevante:FOTO ATUÁL: PNTL Oé-Cusse hala’o pasa-revista ba tum-tum
Jornalista: Abílio Elo Nini
Editór: Florencio Miranda Ximenes
